Пирезидент трамп 2025-йилиниң бешида хитайдин %40 кә йеқин таможна беҗи алмақчи икән

“ройтерс агентлиқи” ниң иқтисадшунаслар арисида елип барған рай синаш нәтиҗисидә көрситилишичә, америка келәр йилиниң бешида хитайдин импорт қилинидиған малларға %40 кә йеқин таможна беҗи елиши, буниң нәтиҗисидә дуняда иккинчи чоң иқтисадий һесабланған хитай иқтисадиниң ешиши 1 пирсәнт төвәнлиши мумкин икән.

Йеқинда хитай мәмликәтлик хәлқ қурултийиниң йиғинида, қийин әһвалда қалған хитай иқтисади вә доналд трампниң хитай билән йеңи сода урушини башлаш еһтималиға қарита йеңи қарар мақулланғаниди. Хитай йәнә, йәрлик һөкүмәтләрниң ғайәт зор қәрзни төлишигә ярдәм бериш үчүн, 1 тириллийон 400 милярд долларлиқ иқтисадни риғбәтләндүрүш пирограммисини җакарлиғаниди.

Хитай нопуси азийиватқан бир вәзийәттә, хитайда 90 милйонға йеқин туралғу өйниң қуруқ һаләттә туруши, өй-мүлүк ширкәтлири вә йәрлик һөкүмәтләрниң қәрз патқиқиға петиши, хитайниң бәзи җайлирида 2021-йилдин буян өй баһасиниң тәхминән %30 чүшүп кетиши, санаәт кириминиң өткән бир йилда %17.8 Төвәнлиши хитай иқтисадиға еғир зәрбә бәргән асаслиқ амиллар һесабланмақта.

Андирс корға охшаш анализчилар хитай маллириға юқири миқдарда таможна беҗи қоюш америка үчүн, болупму америка санаити үчүн пайдилиқ икәнликини, бир тәрәптин америкиниң експортини көпәйтсә, йәнә бир тәрәптин америкиниң хитай билән болған иқтисадий вә сиясий музакирилиридә америка тәрәпниң қолини күчләндүридиғанлиқини илгири сүрмәктә.