Prézidént tramp shimaliy koréyege nisbeten sewri toshqanliqini bildürdi

Muxbirimiz jüme
2017.07.01
Share on WhatsApp
Share on WhatsApp

Amérika prézidénti donald tramp jüme küni shimaliy koréyege nisbeten sewri toshqanliqini bildürdi. U, bu sözlerni jenubiy koréye prézidénti mun ja'éin bilen aqsarayda körüshkendin kéyin élan qilghan birleshme bayanatida otturigha qoydi.

U mundaq dédi: “Shimaliy koréye bilen bolghan istratégiyilik sewri qilish dewri meghlup boldi. Semimiy qilip éytqanda sewrimiz toshti .”tramp yene mundaq dédi: “Shimaliy koréye diktatoriliqi öz xelqi, qoshna el xelqlirining amanliqi we bixeterlikini nezerge élipmu qoymaydu hemde ular insanning jénini hörmet qilmaydu. Bu qayta- qayta ispatlandi.”

Prézidént trampning bu sözliri, amérika herbiy da'irilirining shimaliy koréyege qaritilghan heriket pilanigha tüzitish kirgüzgenliki ilgiri sürülgen mezgilge toghra keldi. 

S n n ning xewer qilishiche, ikki neper yuqiri derijilik amérika herbiy emeldarliri shimaliy koréyege qaritilghan inkasqa herbiy küch qollinish maddisiningmu qoshulghanliqini, eger shimaliy koréye yer asti yadro siniqi élip barsa, bu pilanni amérika prézidéntigha sunidighanliqini éytqan. 

Xewerde neqil qilishiche, peyshenbe küni washin'gtondiki bir tetqiqat jem'iyitide söz qilghan amérika dölet xewpsizliki meslihetchisi hérbért raymond mékmastér shundaq bir pilan barliqini delilligen. U mundaq dégen: biz mumkin bolghan barliq charilerning hemmisige teyyargerlik körüshimiz kérek. Chünki prézidént shimaliy koréyening amérika we amérika xelqini nishan'gha alalaydighan bir yadur küchige ige bolushigha yol qoymaydighanliqini nahayiti éniq bildürdi.”

Uning bu sözliri jenubiy koréye prézidénti munning aqsaray ziyaritidin bir kün awwal otturigha qoyuldi. Mun aqsarayda élan qilghan bayanatida shimaliy koréyeni agahlandurup, shimaliy koréyedin kélidighan tehdit we qutratquluqlarning qattiq inkaslargha duch kélidighanliqini bildürdi.U yene shimaliy koréyeni yadro qoral mesilisini tinch yol bilen hel qilish üchün söhbet üstilige kélishke chaqirdi. 

Bu yil 10-may wezipige olturghan jenubiy koréye prézidénti mun ja'éin 30-iyun amérika prézidénti donald tramp bilen söhbette bolghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.