Ташкәнттики хитай әлчиханиси өзбекистандики уйғур оқуғучиларни тәшкилләп “туғқанлар сөһбәт йиғини” өткүзгән

Мухбиримиз әзиз
2021-12-20
Share

Хитай һөкүмитиниң уйғур дияридики сиясий бастуруш қилмиши һәр саһәниң кәскин тәнқидлишигә дуч келиватқанда, 17-декабир күни өзбекистанда оқуватқан уйғур оқуғучиларниң “туғқанлар сөһбәт йиғини” һәр саһәниң диққитини қозғиди.

Хитай һөкүмити башқуришидики шинхуа агентлиқиниң хәвиридә ейтилишичә, бу қетимлиқ видийолоқ сөһбәттә нуқтилиқ қилип өзбекистанда оқуватқан уйғур оқуғучиларниң ағзидин “америка башчилиқидики дүшмән күчләрниң шинҗаңда ирқий қирғинчилиқ болуватиду, дегән сәпсәтисигә рәддийә берәйли” дегән мәзмунда нутуқлар сөзләнгән. Шуниңдәк “мәҗбурий әмгәк”, “қирғинчилиқ” дегән һадисиләрниң “уйғур диярида әсла мәвҗут әмәслики, әксичә барлиқ кишиләрниң бәхтияр турмуш кәчүриватқанлиқи” алаһидә тәкитләнгән. Хитайниң ташкәнттики баш әлчиханиси уюштурған бу сөһбәт йиғини җәрянида “вәтәнниң бирликини қоғдаш”, “милләтләр иттипақлиқини қоғдаш”, “миллий бөлгүнчиликкә қарши туруш” дегәндәк аталғуларниң көпләп ишлитилиши, бу тор йиғининиң бир қетимлиқ типик сиясий тәшвиқат паалийити икәнликидин бишарәт бәргән.

Мәлум болушичә, хитай һөкүмити йеқинқи мәзгилләрдә тохтимастин һәрқайси дөләтләрдә мушу хилдики “туғқанлар сөһбәт йиғини” тәшкилләш арқилиқ хәлқараниң әйибләшлиригә тақабил турмақчи болуватқанлиқи мәлум. Америка һөкүмити “уйғур мәҗбурий әмгикиниң алдини елиш қанун лайиһәси” ни мутләқ үстүн аваз билән мақуллиғандин кейинки вақитқа тоғра кәлгән бу қетимқи сөһбәт йиғининиң уюштурулишиму мушу мәқсәттә болған, дәп қаралмақта икән.

Һалбуки, уйғурларниң өз қоросиға тәкшүрүш нуқтилиридин өтмәй туруп кирәлмәслики яки уларниң чәт әлләрдики уруқ-туғқанлири билән әң әқәллий болған телефон алақисидиму болалмаслиқи, нөвәттики зулум вә бастурушниң қайсий дәриҗигә берип қалғанлиқини бивастә көрсәтмәктә икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт