Фирансийә кеңәш палатаси әзаси: «дуня хитайниң уйғурларға қаратқан туғут чәклишигә қаттиқ инкас билдүрүши керәк»

Мухбиримиз ирадә
2020-07-02
Елхәт
Пикир
Share
Принт

Фирансийә кеңәш палатаси әзаси әстир бенбасса дуня хитай һөкүмитиниң уйғурларға қаратқан туғут чәкләш һәрикитигә қаттиқ инкас қайтуруши керәк, дегән.

Фирансийә кеңәш палатаси әзаси әстир бенбасса ханим фирансийә хәлқаралиқ радийосниң зияритини қобул қилғанда «хитай һөкүмити уйғур аяллирини туғмаслиққа яки бала чүшүрүшкә мәҗбурлиған. Хитай әмәлдарлириниң аз санлиқ милләтләргә қаратқан бастуруши бир йеңилиқ әмәс, әмма бу һәқиқәтән бир зиянкәшлик,» дегән.

29-Июн күни германийәлик тәтқиқатчи адриян зениз «һамилидарлиқтин сақлиниш, мәҗбурий туғут чәкләш: хитай компартийәсиниң уйғурларниң туғулуш нисбитини контрол қилиш һәрикити» намлиқ һөҗҗәтлик доклат елан қилип зор ғулғула қозғиған иди.

Доклатта уйғурлар әң көп олтурақлашқан қәшқәр вә хотәндин ибарәт бу икки райондики уйғур нопусиниң 2015-йилидин башлап тик сизиқ билән төвәнләп маңғанлиқи вә 2020-йилиға кәлгәндә нопусниң көпийиш нисбити нөлгә чүшүрүлгәнлики қәйт қилинған вә уйғурларниң нопусиниң чәклиниши билән бир вақитта зор көләмдә хитай нопусиниң уйғур райониға көчүрүлүши уйғурларни ассимилятсийә қилип йоқитиш пиланиниң бир қисми дейилгән.

Фирансийәлик сиясәтчи әстир бенбасса сөзидә «буниң ирқий қирғинчилиқ икәнликидә шәк йоқ,» дегән. У йәнә уйғур елидики зулум һәққидә фирансийә һөкүмитигә чақириқ қилинған болсиму, бирақ һөкүмәтниң очуқ ипадә билдүрмигәнликини әскәрткән вә «биз бу һәқтә иҗабий қәдәмләр ташлинишини вә һәрқайси дөләтләрниң бу мәсилидә ортақ һәрикәт қилишини үмид қилимиз,» дегән.

Пикирләр (0)
Share
Толуқ бәт