Хитайниң туғут чәклимисини бикар қилидиғанлиқи алға сүрүлмәктә

Мухбиримиз әзиз
2018.05.22

Түрлүк ахбарат васитилириниң учурлириға қариғанда, хитайниң ичи вә тешида һәммила кишигә “пиланлиқ туғут” дегән намда мәлум болуп келиватқан хитайдики туғутқа чәк қоюш бәлгилимисиниң мушу йил ичидә бикар қилинидиғанлиқи алға сүрүлмәктә.

Америкидики “фокус хәвәрлири”ниң 22-майдики хәвиригә қариғанда, хитай һөкүмити һәрқайси аилиләргә қаритилған туғут чәклимисини йеқинда бикар қилиш һәққидә җиддий ойлашмақта икән. Бу һәқтики қарар мушу йилниң ахири яки 2019-йилиниң бешида елан қилиниши мумкин икән.

Мәлум болушичә, хитай һөкүмити 1970-йилларниң ахирлиридин башлап пиланлиқ туғут сияситини йолға қойғанлиқтин 2017-йилиға кәлгәндә пүткүл хитайниң нопус нисбитидә еғир ғәйрийлик барлиққа кәлгән, шундақла әрләрниң сани аяллар санидин 32 милйон ешип кәткән.

Мәлум болушичә, хитай һөкүмити 2015-йили пиланлиқ туғут сиясити сәвәблик оттуриға чиққан йезилардики әмгәк күчи мәсилисини һәл қилиш үчүн йезилардики “бирла пәрзәнтлик” болушни “икки пәрзәнтлик болуш” қа өзгәрткән. Әмма шу вақитлардиму буниң изчил йосунда хитайдики “пиланлиқ туғут сиясити”ниң қурбани болуп келиватқан уйғурларға қилчә мәнпәәтлик болмиғанлиқи, әксичә уйғурлар дияридики хитай нопусиниң техиму көпийишигә йочуқ ечилғанлиқи мәлум болған иди.

Уйғурлар дияридики вәзийәт билән тонушлуқ кишиләр бу һәқтә пикир қилип: “пиланлиқ туғут сияситиниң бикар қилинишиниң уйғур җәмийитигә қандақ мәнпәәтләрни елип келидиғанлиқи һәққидә һазирчә бирнәрсә демәк қийин” дейишмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.