“Tulpar mukapati” gha tallan'ghan edebiy eserler ichide xitayche eser yazidighan Uyghur yazghuchilirining eserliri köpeymektiken

Yéqinda xitay edebiyat sahesidiki eng chong mukapatlarning biri bolghan “Tulpar mukapati” ning 2016-yilliq namzatliri tizimi élan qilin'ghan.

Junggo yazghuchilar torining ilgiri sürüshiche, xitaydiki 55 az sanliq millet yazghuchilirining 75 parche esiri bu yilliq “Tulpar mukapati” gha tallan'ghan. Uning ichide 6 neper Uyghur yazghuchining her xil zhanirlardiki esiri bu yilliq “Tulpar mukapati” gha érishkenliki melum.

“Tulpar mukapati” xitay hökümiti tesis qilghan, xitaydiki az sanliq milletler edebiyati sahesidiki eng chong mukapat bolup, her yili xitaydiki az sanliq milletler yazghuchilirining “Nadir eserliri” bahalashqa qatnashturulidiken. Halbuki, xitay ichi we sirtidiki musteqil yazghuchilar bilen közetküchiler, “Tulpar mukapati” ning sap sen'et prinsiplirigha qarighanda siyasiy ölchemni bekrek tutqa qilidighanliqini tekitlimekte.

Igilinishiche, 28-iyul küni béyjingda élan qilin'ghan bu yilliq “Tulpar mukapati” ning érishküchiliri ichide yazghuchi gheyret asim, ashé we gülnar obul qatarliq üch neper xitay tilida eser yazidighan Uyghur yazghuchisining eserliri bilen abbas muniyaz, ilgharjan sadiq we es'et abduréshit qatarliq 3 neper Uyghur tilida eser yazidighan yazghuchilarning eserliri bar iken.

Ilgiriki yillarda “Tulpar mukapati” gha tewsiye qilin'ghan Uyghur yazghuchilirining köpinchisi Uyghur tilida eser yazidighan yazghuchilar bolup, yéqinqi yillardin buyan mezkur mukapatqa köpinche xitay tilida eser yazidighan Uyghur yazghuchilar eserliri körsitilmektiken.

Ejeblinerliki shuki, bu yil martta “Shinjang tarixini burmilash we kompartiyening obrazini xunükleshtürüsh” jinayiti bilen eyiblinip tutqun qilin'ghan yazghuchi ömerjan hesen bozqir ilgiriki yillarda “Shyangzi töge” namliq téléwiziye terjime esiri bilen “Tulpar mukapati” gha érishken Uyghur yazghuchilirining biri iken.