"Junggo türkiy tillar étimologiye xelq'ara ilmiy muhakime yighini" béyjingdiki milletler uniwérsitétida ötküzülgen

"Junggo türkiy tillar étimologiye tetqiqati xelq'araliq ilmiy muhakime yighini" 2016 - yili 10 - ayning 22 - we 23 - künliri béyjingdiki merkiziy milletler uniwérsitétida ötküzülgen.

Mezkur muhakime yighin'gha türkiy tillar tetqiqati bilen shughulliniwatqan xitay we chet ellerdiki til tetqiqatchiliridin 35 neper mutexessis qatnashqan hemde özlirining mexsus témilardiki ilmiy maqalilirini oqughan.

Yighin'gha xelq'ara türkologiye saheside tonulghan alimlardin "Türkiy tillar diwani" ni in'giliz tiligha terjime qilghan chikago uniwérsitétining proféssori robért dankof, gérmaniyediki qedimki Uyghur tili mutexessisliridin pétir zimé we marsél erdal, türkiyediki tilchilardin proféssor ayshe melek özyetken xanim bilen doktor mehmet ölmez, shiwétsiye upsala uniwérsitétining proféssori lazi'o karolu qatarliqlar qatnashqan.

Bu qétimqi ilmiy muhakime yighinida qedimki türkiy tili bilen yézilghan wesiqilerning tili hem qurulmisi, qedimki Uyghur tilida yézilghan bir qisim wesiqe - höjjetler we ularda qollinilghan sözlerning étimologiyesi, hazirqi zaman Uyghur, qazaq, qirghiz we sériq Uyghur tilliridiki bir qisim sözlerning étimologiyesi hemde bir qisim xitayche - Uyghurche sözlerning menbesi qatarliq témilarda yézilghan maqalilar oqulghan.

Igilinishiche, yéqinqi yillardin buyan xitay hökümiti zor miqdarda meblegh ajritip yawropa kutupxaniliri we muzéylirida saqliniwatqan qedimki Uyghur til - yéziqidiki matériyallarni toplashqa bashlighan. Shuning bilen bir waqitta yene gherb elliride Uyghur tetqiqati bilen shoghullinip közge körün'gen alimlarni her xil namlarda xitaygha teklip qilip, ularni idiye jehettin kontrol qilishqa urunmaqtiken.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar