Türkiyede "Réyna térrorluq weqesi" ge chétishliq dep qolgha élin'ghan 19 kishi qoyup bérilgen

Muxbirimiz erkin
2019-02-20
Élxet
Pikir
Share
Print

Türkiyede 2017‏-yilining yéngi yil kéchisi yüz bergen "Réyna térrorluq weqesi" ge chétishliq dep qolgha élin'ghan 19 kishi qoyup bérilgen.

Istanbulning ortaköy rayonidiki réyna kechlik kulubida yüz bergen mezkur térrorluq hujumida 39 adem ölgen. Térrorluq hujumining özbékistan puqrasi bolghan abduqadir meshrepof isimlik da'éshchi teripidin élip bérilghanliqi ilgiri sürülgen.

Weqedin kéyin meshrepofni öz ichige alghan 58 adem qolgha qilin'ghan. Tutqunlarning ichide gumanliq dep qolgha élin'ghan Uyghurlar xéli köp salmaqni igiligen idi.

"Höriyet géziti" ning xewer qilishiche, 18‏-féwral küni istanbuldiki bir sot mehkimisi tutqunlar üstidin sot achqan.

Shu küni sot mehkimisi qarar chiqirip, abdukérim memet abdulla, abduweli yasin, adil sélim, éli muhemmet'imin, dölet memet'eli, merdan tursun qatarliq 19 kishini qoyup bérishke buyrughan.

"Höriyet géziti" ning xewiride körsitilishiche, jinayetke da'ir mewjut delillerning ehwali, delillerning zor qismining toplan'ghanliqi, bu kishilerning delillerni özgertiwétish éhtimalliqining yoqluqi qatarliq amillarni közde tutup, yuqiriqi kishilerni qoyup bérishni qarar qilghan. Emma ularning chet'elge chiqishini chekligen. Sot mehkimisi yene abduqadir meshrepofni öz ichige 20 kishini dawamliq tutup turup sotlashni qarar qilghan.

Eyni waqitta "Réyna térrorluq hujumi" gha bezi Uyghurlarning chétishliq dep qolgha élinishi we türkiyening bir emeldarining abduqadir meshrepofni Uyghur dep élan qilishi türkiyediki Uyghurlarning qattiq naraziliqini qozghighan idi.

Meshrepofning özbékistan puqrasi ikenliki ashkarilan'ghandin kéyin, yuqiriqi türkiye emeldari Uyghurlardin kechürüm sorashqa mejbur bolghan idi.

Toluq bet