Әрдоған русийәдин әпу сорашни рәт қилди

Мухбиримиз әркин
2015-11-26
Share

Түркийә билән русийә оттурисида партлиған кризис давамлиқ өткүрләшти. Түркийә президенти әрдоған пәйшәнбә күни русийәдин әпу сорашни рәт қилған. У, америка телевизийә қанили CNN ниң зияритини қобул қилғанда, “өзрә тиләйдиған тәрәп бар болса у биз әмәс, һава бошлуқимизға мудахилә қилғанлар өзрә тилиши керәк” дегән.

Буниңдин аввал русийә президенти владимир путин, түркийәниң өрүр тилишини күтүватқанлиқини билдүргән иди. Түркийә чаршәнбә күни русийәниң SU-24 типлиқ бир уруш айропиланини етип чүшүрүвәткән. Русийә буниңға кәскин инкас қайтуруп, сүрийәдики һәрбий күчлиригә һавадики һәрқандақ тәһдитни соал-сорақсиз уруп чүшүрүш буйруқи бәргән.

Шуниң билән биргә у, сүрийәниң лазкийә районидики һәрбий базисиға S-400 типлиқ айропиланға қариши башқурулидиған бомба орунлаштуридиғанлиқини елан қилған. Мәзкур база түркийә чеграсиға алаһазәл 50 километир келиду.

Русийә йәнә, сүрийәдики түркийә қоллаватқан қораллиқ өктичи гуруһларни бомбардиман қилишни күчәйткән. Шиддәтлик бомбардиман нәтиҗисидә пәйшәнбә күни қораллиқ түркмән өктичи күчләр контрол қилип турған, түркийәгә чегридаш қизилтағ райони әсәд армийисиниң қолиға өткән.

Русийә түнүгүн йәнә сүрийә чеграсида мусапирларға ярдәм буюми елип маңған бир түрк йүк аптомобил әтритини бомбардиман қилған иди. Рейтерс агентлиқиниң билдүрүшичә, бомбардиманда 7 адәм өлгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт