Түркийә һөкүмити уйғур райониға вәкилләр өмики әвәтидикән

Мухбиримиз җәвлан
2022.08.05
Share on WhatsApp
Share on WhatsApp

“җәнубий хитай сәһәр почтиси” гезитиниң хәвәр қилишичә, б д т кишилик һоқуқ алий комиссари мишел бачелет уйғур районини зиярәт қилип 2 ай өткәндә, хитай һөкүмити түркийә вәкилләр өмикиниң уйғур райониға келишигә йол қоймақчи болған.

Камбоджада өткүзүлгән җәнубий асия дөләтлири бирләшмә йиғиниға қатнашқан хитай ташқи ишлар министири ваң йи 8-айниң 3-күни түркийә ташқи ишлар министири мәвлут чавушоғлуға түркийә вәкилләр өмикиниң хитайға келишини қарши алидиғанлиқини билдүрүп: “хитай һөкүмити шинҗаң мәсилисидә изчил һалда очуқ-ашкара болуп кәлди” дегән. Ваң йи йәнә уйғурлар мәсилисидә түркийә билән давамлиқ пикир алмаштуридиғанлиқини, түркийә билән йеңи иқтисадий гәвдә қуруш үчүн давамлиқ һәмкарлишидиғанлиқини билдүргән.

Мәвлут чавушоғлу түркийә һөкүмитиниң “бир хитай” сияситидә чиң туридиғанлиқини, ялғуз тәйвән мәсилисигила әмәс, шинҗаң мәсилисигиму көңүл бөлидиғанлиқини ейтқан. У йәнә мишел бачелетниң уйғур районини зиярәт қилғанлиқидин хушал болғанлиқини, пат арида түркийәдин бир өмәкни әвәтиш һәққидә хитай тәрәп билән алақилишишни үмид қилидиғанлиқини билдүргән.

Хәвәрдә көрситилишичә, уйғурлар мәсилиси түркийә билән хитай оттурисидики назук мәсилә болуп, түркийәдә яшаватқан 50 миңдин көп уйғурниң тәқдириму бу икки дөләтниң мәнпәәт мунасивитидә һалқилиқ рол ойнайдикән. Мишел бачелетниң 2 ай бурунқи “шинҗаң зиярити” нәтиҗисиз аяғлашқан болуп, түркийә әвәтидиған өмәкниң тәкшүрүш өмики әмәс, зиярәт өмики болидиғанлиқини нәзәрдә тутқанда униң нәтиҗисиниңму хитай күткәндәк болидиғанлиқини пәрәз қилишқа болидикән.

Көп көрүлгән хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.