Хитай тәрәп түркийә ташқи ишлар министириниң уйғурлар һәққидики сөзигә инкас қайтурди

Мухбиримиз әркин
2019-02-27
Share

Түркийә ташқи ишлар министири мәвлут чавушоғлуниң уйғурларниң диний әркинлики вә мәдәнийитигә һөрмәт қилиш һәққидики чақириқиға хитай һөкүмити инкас қайтурди.

Хитай ташқи ишлар министирлиқи 27‏-феврал баянат елан қилип, түркийәни хитайға төһмәт қилиш билән әйиблигән. Мәвлут чавушоғлу 25‏-феврал күни б д т кишилик һоқуқ кеңишиниң 40‏-нөвәтлик йиғинида нутуқ сөзләп, хитайниң уйғур аптоном районидики уйғур вә башқа мусулман аз санлиқ милләтләрниң кишилик һоқуқлириға хилаплиқ қиливатқанлиқиға даир доклатларниң әндишә қозғаватқанлиқини билдүргән. У хитайниң "террорчилар билән бигунаһ инсанларни пәрқләндүрүши керәклики" ни тәкитлигән иди.

Чавушоғлу хитай һөкүмити уйғур җәмийитини омумйүзлүк тәқиб астиға алған шуниңдәк йәнә 800 миңдин 2 милйонғичә уйғур, қазақ вә башқа мусулман хәлқләрни лагерларға қамап, уларни миллий мәдәнийити вә диний етиқадидин ваз кечишкә мәҗбурлиғанлиқиға даир ишәнчлик дәлилләр ашкариланған әһвалда юқириқи сөзни қилған. Бу дәлилләр түркийә җәмийитидә ғулғула қозғап, әрдоған һөкүмитигә қаттиқ бесим пәйда қилған иди. Лекин хитай ташқи ишлар министирлиқиниң баянатчиси лу каң 27‏-феврал қайтурған инкасида хитайға бир тәрәплимилик қаримайдиған, яман ғәризи йоқ дөләтләрла униңға тәбәссум билән қарайдиғанлиқи, ялғанни ойдуруп, уни дүшмәнләрчә әйиблимәйдиғанлиқини тәкитлигән.

Униң илгири сүрүшичә, түркийә көп милләтлик дөләт болуш сүпитидә охшашла террорлуқ тәһдитигә дуч кәлмәктә икән. У түркийәгә тәһдит селип, "әгәр түркийә террорлуққа қарши турушта ‹икки хил өлчәм' қолланса, у башқиларға зиян селиш билән бир вақитта йәнә өзигиму зиян салиду" дегән.

Б д т кишилик һоқуқ кеңишиниң 25‏-февралдики йиғинида хитайниң уйғурларға тутқан муамилиси түркийәниң тәнқидигә учрапла қалмай йәнә әнглийәниң тәнқидигиму учриған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт