Xitay terep türkiye tashqi ishlar ministirining Uyghurlar heqqidiki sözige inkas qayturdi

Muxbirimiz erkin
2019-02-27
Élxet
Pikir
Share
Print

Türkiye tashqi ishlar ministiri mewlut chawush'oghluning Uyghurlarning diniy erkinliki we medeniyitige hörmet qilish heqqidiki chaqiriqigha xitay hökümiti inkas qayturdi.

Xitay tashqi ishlar ministirliqi 27‏-féwral bayanat élan qilip, türkiyeni xitaygha töhmet qilish bilen eyibligen. Mewlut chawush'oghlu 25‏-féwral küni b d t kishilik hoquq kéngishining 40‏-nöwetlik yighinida nutuq sözlep, xitayning Uyghur aptonom rayonidiki Uyghur we bashqa musulman az sanliq milletlerning kishilik hoquqlirigha xilapliq qiliwatqanliqigha da'ir doklatlarning endishe qozghawatqanliqini bildürgen. U xitayning "Térrorchilar bilen bigunah insanlarni perqlendürüshi kérekliki" ni tekitligen idi.

Chawush'oghlu xitay hökümiti Uyghur jem'iyitini omumyüzlük teqib astigha alghan shuningdek yene 800 mingdin 2 milyon'ghiche Uyghur, qazaq we bashqa musulman xelqlerni lagérlargha qamap, ularni milliy medeniyiti we diniy étiqadidin waz kéchishke mejburlighanliqigha da'ir ishenchlik deliller ashkarilan'ghan ehwalda yuqiriqi sözni qilghan. Bu deliller türkiye jem'iyitide ghulghula qozghap, erdoghan hökümitige qattiq bésim peyda qilghan idi. Lékin xitay tashqi ishlar ministirliqining bayanatchisi lu kang 27‏-féwral qayturghan inkasida xitaygha bir tereplimilik qarimaydighan, yaman gherizi yoq döletlerla uninggha tebessum bilen qaraydighanliqi, yalghanni oydurup, uni düshmenlerche eyiblimeydighanliqini tekitligen.

Uning ilgiri sürüshiche, türkiye köp milletlik dölet bolush süpitide oxshashla térrorluq tehditige duch kelmekte iken. U türkiyege tehdit sélip, "Eger türkiye térrorluqqa qarshi turushta 'ikki xil ölchem' qollansa, u bashqilargha ziyan sélish bilen bir waqitta yene özigimu ziyan salidu" dégen.

B d t kishilik hoquq kéngishining 25‏-féwraldiki yighinida xitayning Uyghurlargha tutqan mu'amilisi türkiyening tenqidige uchrapla qalmay yene en'gliyening tenqidigimu uchrighan idi.

Toluq bet