Türkiyening qeyseri qatarliq sheherliride Uyghurlar üchün ghayibane méyit namizi oquldi

26-Iyun jüme küni türkiyening qeyseri, enqere, erzinjan, tokat we siwas qatarliq sheherliridiki meschitlerde 22-iyun qeshqer shehiridiki toqunushta xitay saqchiliri teripidin öltürülgen Uyghurlar we xitayning roza tutushni cheklesh belgilimilirige boysunmighanliqi seweb qilip öltürülgen barliq Uyghurlar üchün ghayibane méyit namizi oqulghan.

26-Iyun qeyseridiki hunat jameside jüme namizidin kéyin, ülkü ojaqlirining wilayetlik shöbisining bashchiliqida hayatidin ayrilghan Uyghurlar üchün ghayibane méyit namizi oqulghan. Namazgha qeyseridiki türkler, Uyghurlar we bashqa musulman milletler qatnashqan. Jüme küni yene türkiyediki dangliq meschitlerdin erzinjanda kebir jameside, tokatning eli pasha jamesi we sushehri nahiyesidiki baltuxan jamesi qatarliqlardimu xitay hökümitining basturushida öltürülgen Uyghurlar üchün ghayibane méyit namizi oqulghan.

Türkiyediki herqaysi ommiwi teshkilatlar yéqindin buyan sherqiy türkistan we Uyghur mesilisige alahide köngül bölüwatqan bolup, jüme küni türkiyening herqaysi sheherliride ötküzülgen öltürülgen Uyghurlar üchün ghayibane méyit namizigha türkiyediki ülkü ojaqliri, milliyetchi heriket partiyesi qatarliq teshkilatlarning ezaliri qatnashqan. Uningdin 26-iyun jüme küni yene enqerediki xitay elchixanisining aldida iptar qilish pa'aliyiti ötküzülidiken.