Түркийәниң әң чоң өктичи партийәси: «уйғурлар түркийә-хитай мунасивәтлиригә қурбан қиливетилмәслики керәк»

Мухбиримиз әркин
2020-01-17
Елхәт
Пикир
Share
Принт

Түркийә җумһурийәт хәлқ партийәсиниң парламент әзаси утку чакирөзәр 17‏-январ күни түркийә парламентиниң ташқи ишлар комитетида сөз қилип, уйғурларниң түркийә-хитай мунасивәтлиригә қурбан қиливетилмәслики керәкликини билдүргән. Униң тәкитлишичә, түркийә хитайға тәкшүрүш өмики әвәтип, уйғурларниң кишилик һоқуқи дәпсәндә қилиниватқанлиқиға даир инкасларни тәкшүрүши керәк икән. Сиясий йоли сотсиял демократ болған җ һ п ниң түркийә парламентида уйғур мәсилисини тилға елиши тунҗи қетим болмисиму, лекин көп учрайдиған һадисә әмәс.

Түркийә президенти әрдоған өткән йили хитайни зиярәт қилғанда хитайниң уйғур райониға тәкшүрүш өмики әвәтиш тәклипини қобул қилған иди. Утку чакирөзәр сөзидә ташқи ишлар министири мәвлүт чавушоғлиниң 6 ай аввал хитайға тәкшүрүш өмики әвәтишни елан қилған болсиму, лекин униң һазирғичә ишқа ашмиғанлиқини билдүрүп, әрдоған һөкүмитини уйғурларниң һәқ-һоқуқлириниң дәпсәндә қилинишиға «җидди» қаримаслиқ билән әйиблигән. 

«Мустәқил алақә» намлиқ түрк тор гезитиниң хәвәр қилишичә, утку чакирөзәр, «уйғурлар хитай билән болған мунасивәтләргә қурбан қиливетилмәслики керәк» дегән. Утку чакирөзәр бу сөзләрни түрк таратқулирида әрдоған һөкүмитиниң истанбул боғизидики 3‏-көврүкниң бир қисим пай чекини хитайларға сатқанлиқи, хитайларниң истанбулда «хитай базири» қурушқа киришкәнлики, түркийә пуқралиқини елиш үчүн кәң көләмлик өй-мүлк сетивеливатқанлиқи, әрдоған һөкүмитиниң хитайлар билән қанал истанбул қурулушиға мәбләғ селиш һәққидә сөһбәт елип бериватқанлиқи вә шундақла түркийәдики әрдоғанни қоллайдиған бейҗиңпәрәс радикал сол паретийә «вәтән» партийәси вә униң контроллуқидики «айдинлиқ» гезити уйғур паалийәтчилирини киа ниң җасуси, дәп әйибләп, һуҗум қиливатқан мәзгилдә қилди. 

«Мустәқил алақә тори» гезитиниң билдүрүшичә, түркийә муавин ташқи ишлар министири явуз сәлим киран утку чакирөзәрниң сөзигә җаваб берип, өзлириниң тәкшүрүш өмики әвәтишкә тәйярлиқ қиливатқанлиқи, бейҗиң билән зиярәт қилинидиған конкерт орунлар һәққидә сөзлишиватқанлиқини билдүргән.

Пикирләр (0)
Share
Толуқ бәт