Türkiyening eng chong öktichi partiyesi: "Uyghurlar türkiye-xitay munasiwetlirige qurban qiliwétilmesliki kérek"

Muxbirimiz erkin
2020-01-17
Élxet
Pikir
Share
Print

Türkiye jumhuriyet xelq partiyesining parlamént ezasi utku chakir'özer 17‏-yanwar küni türkiye parlaméntining tashqi ishlar komitétida söz qilip, Uyghurlarning türkiye-xitay munasiwetlirige qurban qiliwétilmesliki kéreklikini bildürgen. Uning tekitlishiche, türkiye xitaygha tekshürüsh ömiki ewetip, Uyghurlarning kishilik hoquqi depsende qiliniwatqanliqigha da'ir inkaslarni tekshürüshi kérek iken. Siyasiy yoli sotsiyal démokrat bolghan j h p ning türkiye parlaméntida Uyghur mesilisini tilgha élishi tunji qétim bolmisimu, lékin köp uchraydighan hadise emes.

Türkiye prézidénti erdoghan ötken yili xitayni ziyaret qilghanda xitayning Uyghur rayonigha tekshürüsh ömiki ewetish teklipini qobul qilghan idi. Utku chakir'özer sözide tashqi ishlar ministiri mewlüt chawush'oghlining 6 ay awwal xitaygha tekshürüsh ömiki ewetishni élan qilghan bolsimu, lékin uning hazirghiche ishqa ashmighanliqini bildürüp, erdoghan hökümitini Uyghurlarning heq-hoquqlirining depsende qilinishigha "Jiddi" qarimasliq bilen eyibligen. 

"Musteqil alaqe" namliq türk tor gézitining xewer qilishiche, utku chakir'özer, "Uyghurlar xitay bilen bolghan munasiwetlerge qurban qiliwétilmesliki kérek" dégen. Utku chakir'özer bu sözlerni türk taratqulirida erdoghan hökümitining istanbul boghizidiki 3‏-köwrükning bir qisim pay chékini xitaylargha satqanliqi, xitaylarning istanbulda "Xitay baziri" qurushqa kirishkenliki, türkiye puqraliqini élish üchün keng kölemlik öy-mülk sétiwéliwatqanliqi, erdoghan hökümitining xitaylar bilen qanal istanbul qurulushigha meblegh sélish heqqide söhbet élip bériwatqanliqi we shundaqla türkiyediki erdoghanni qollaydighan béyjingperes radikal sol parétiye "Weten" partiyesi we uning kontrolluqidiki "Aydinliq" géziti Uyghur pa'aliyetchilirini ki'a ning jasusi, dep eyiblep, hujum qiliwatqan mezgilde qildi. 

"Musteqil alaqe tori" gézitining bildürüshiche, türkiye mu'awin tashqi ishlar ministiri yawuz selim kiran utku chakir'özerning sözige jawab bérip, özlirining tekshürüsh ömiki ewetishke teyyarliq qiliwatqanliqi, béyjing bilen ziyaret qilinidighan konkért orunlar heqqide sözlishiwatqanliqini bildürgen.

Toluq bet