Түркийә ички ишлар министири уйғурларни “хәлқара системиниң суйиистемалидин һәзәр әйләш” кә агаһландурған

Мухбиримиз әркин
2021.02.15
Share on WhatsApp
Share on WhatsApp

Түркийә ички ишлар министири сулайман сойлу 15-феврал ички ишлар министирлиқиниң орган торида баянат елан қилип, түркийәдики уйғурларни агаһландурған. Униң тәкитлишичә, уйғурлар окянниң у тәрипидә пиланланған, хәлқара тоқунуш сәвәби қилинмақчи болған, улар чекиватқан изтирап, зулумлирини хәлқара системиниң суйиистемал қилишидин һәзәр әйлиши керәк икән. Бу түркийә һөкүмитиниң кабинет дәриҗилик әмәлдариниң тунҗи қетим хитай лагерлиридики уйғур қурбанлириниң түркийәдики аилә әзалириниң “аиләм қени” һәрикитигә инкас қайтурушидур. Өткән йили 12-айда башланған уйғурларниң “аиләм қени” һәрикити түркийә җәмийити вә хәлқараниң һесдашлиқини қозғиған.

Бирақ түркийә сақчилириниң бу аилә әзалириға тутқан муамилиси чәтәлдики уйғурларниң вә түркийәдики өктичи партийәләрниң наразилиқиға учриған. Һөкүмәт хитай лагерлиридики уйғур түрк гиражданлириға көз юмуш билән әйибләнгән иди. Сулайман сойлу, уйғурларниң түркийәдә һөр, әркин яшаватқанлиқи, уларға мәңгүлүк туруш рухсити, гиражданлиққа қобул қилиш, көчмәнләр идарисидики ишларда алаһидә имтияз билән муамилә қилиниватқанлиқини билдүргән болсиму, бирақ уйғурларниң немә үчүн хитай консулханисиға илтимас сунушиға рухсәт қилмайдиғанлиқи, немә үчүн уйғур лагер қурбанлириниң аилә әзалирини нәзәрбәнд қилғанлиқиға чүшәнчә бәрмигән.

У пәқәт түркийәниң ата-анисиз қалған пәрзәнтләргә игә болуш, уларниң тәлим-тәрбийә мәсилилирини һәл қилиш қатарлиқ ишларда ярдәм қиливатқанлиқини билдүрүп, бу ишларда “қолимизниң көксимиздә болуши миллитимизниң есиллики, қериндашлиқимизниң нәтиҗисидур” дегән. У баянатида кишиләрни агаһландуруп: “диққитимиз, уйғур түрки қериндашлиримизниң окянниң у тәрипидә пиланланған, хәлқара тоқунуш сәвәби қилинмақчи болушиға қарита диққәтлик болушидур. Диққитимиз, чекиватқан изтирап вә зулумларни хәлқара системиниң суйиистемал қилишиға қарши диққәтлик болуштадур”, дегән. Бирақ у окянниң у тәрипидикиләрниң ким икәнликини тилға алмиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.