Türkiye ichki ishlar ministiri Uyghurlarni "Xelq'ara sistémining suyi'istémalidin hezer eylesh" ke agahlandurghan

Muxbirimiz erkin
2021-02-15
Share

Türkiye ichki ishlar ministiri sulayman soylu 15-féwral ichki ishlar ministirliqining organ torida bayanat élan qilip, türkiyediki Uyghurlarni agahlandurghan. Uning tekitlishiche, Uyghurlar okyanning u teripide pilanlan'ghan, xelq'ara toqunush sewebi qilinmaqchi bolghan, ular chékiwatqan iztirap, zulumlirini xelq'ara sistémining suyi'istémal qilishidin hezer eylishi kérek iken. Bu türkiye hökümitining kabinét derijilik emeldarining tunji qétim xitay lagérliridiki Uyghur qurbanlirining türkiyediki a'ile ezalirining "A'ilem qéni" herikitige inkas qayturushidur. Ötken yili 12-ayda bashlan'ghan Uyghurlarning "A'ilem qéni" herikiti türkiye jem'iyiti we xelq'araning hésdashliqini qozghighan.

Biraq türkiye saqchilirining bu a'ile ezalirigha tutqan mu'amilisi chet'eldiki Uyghurlarning we türkiyediki öktichi partiyelerning naraziliqigha uchrighan. Hökümet xitay lagérliridiki Uyghur türk girazhdanlirigha köz yumush bilen eyiblen'gen idi. Sulayman soylu, Uyghurlarning türkiyede hör, erkin yashawatqanliqi, ulargha menggülük turush ruxsiti, girazhdanliqqa qobul qilish, köchmenler idarisidiki ishlarda alahide imtiyaz bilen mu'amile qiliniwatqanliqini bildürgen bolsimu, biraq Uyghurlarning néme üchün xitay konsulxanisigha iltimas sunushigha ruxset qilmaydighanliqi, néme üchün Uyghur lagér qurbanlirining a'ile ezalirini nezerbend qilghanliqigha chüshenche bermigen.

U peqet türkiyening ata-anisiz qalghan perzentlerge ige bolush, ularning telim-terbiye mesililirini hel qilish qatarliq ishlarda yardem qiliwatqanliqini bildürüp, bu ishlarda "Qolimizning köksimizde bolushi millitimizning ésilliki, qérindashliqimizning netijisidur" dégen. U bayanatida kishilerni agahlandurup: "Diqqitimiz, Uyghur türki qérindashlirimizning okyanning u teripide pilanlan'ghan, xelq'ara toqunush sewebi qilinmaqchi bolushigha qarita diqqetlik bolushidur. Diqqitimiz, chékiwatqan iztirap we zulumlarni xelq'ara sistémining suyi'istémal qilishigha qarshi diqqetlik bolushtadur", dégen. Biraq u okyanning u teripidikilerning kim ikenlikini tilgha almighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet