Түркийә ташқи ишлар министири б д т да хитайниң уйғур сияситини тәнқид қилди

Мухбиримиз әркин
2019-02-25
Share

Түркийә ташқи ишлар министири мәвлут чавушоғлу б д т ниң кишилик һоқуқ кеңишидә нутуқ сөзләп, хитайни уйғурларниң вә райондики башқа мусулман аз санлиқ милләтләрниң универсал һәқ-һоқуқи вә диний әркинликигә һөрмәт қилишқа чақирған.

Бу, түркийә һөкүмитиниң йеқинқи 2 һәптә ичидә уйғур мәсилиси бойичә хитайға 2‏-қетим наразилиқ билдүрүшидур. Түркийә ташқи ишлар министирлиқи 9‏-феврал елан қилған баянатида хитайни уйғур районидики лагерларни тақашқа чақирған иди.

Мәвлут чавушоғлу 25‏-феврал күни б д т кишилик һоқуқ кеңишиниң 40‏-нөвәтлик йиғинида сөзлигән нутқида юқириқи чақириқини оттуриға қойған.

Бирләшмә агентлиқиниң хәвәр қилишичә, чавушоғлу хитайниң уйғур аптоном районидики уйғур вә башқа мусулман аз санлиқ милләтләрниң кишилик һоқуқлириға хилаплиқ қиливатқанлиқиға даир доклатларниң әндишә қозғаватқанлиқини билдүрүп, хитайниң "террорчилар билән бигунаһ инсанларни пәрқләндүрүши керәк" ликини тәкитлигән.

У мундақ дегән: "б д т ирқий айримичилиқни түгитиш комитетиниң тәкшүрүш нәтиҗиси, шуниңдәк шинҗаң уйғур аптоном районидики уйғур вә башқа мусулманларниң инсан һәқлириниң дәпсәндичиликкә учраватқанлиқиға даир доклатлар әндишә қозғимақта".

Бирләшмә агентлиқиниң қәйт қилишичә, чавушоғлу йәнә "хитайниң террорлуққа қарши туруш һоқуқи болсиму, лекин униң диний әркинликкә, уйғур вә башқа мусулманларниң мәдәнийәт кимликигә һөрмәт қилиши керәк" ликини билдүргән.

Түркийә һөкүмити узундин бери хитайниң уйғур дияридики бастурушиға қарита өзини тутувелишқа тиришқан болсиму, лекин у йеқинда ахири сүкүтини бузған. Түркийә ташқи ишлар министирлиқи 9-феврал елан қилған баянатида, хитайниң уйғурларға тутқан муамилисини "инсанийәткә нисбәтән еғир номус" дегән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт