Türkiye tashqi ishlar ministiri b d t da xitayning Uyghur siyasitini tenqid qildi

Muxbirimiz erkin
2019-02-25
Share

Türkiye tashqi ishlar ministiri mewlut chawush'oghlu b d t ning kishilik hoquq kéngishide nutuq sözlep, xitayni Uyghurlarning we rayondiki bashqa musulman az sanliq milletlerning uniwérsal heq-hoquqi we diniy erkinlikige hörmet qilishqa chaqirghan.

Bu, türkiye hökümitining yéqinqi 2 hepte ichide Uyghur mesilisi boyiche xitaygha 2‏-qétim naraziliq bildürüshidur. Türkiye tashqi ishlar ministirliqi 9‏-féwral élan qilghan bayanatida xitayni Uyghur rayonidiki lagérlarni taqashqa chaqirghan idi.

Mewlut chawush'oghlu 25‏-féwral küni b d t kishilik hoquq kéngishining 40‏-nöwetlik yighinida sözligen nutqida yuqiriqi chaqiriqini otturigha qoyghan.

Birleshme agéntliqining xewer qilishiche, chawush'oghlu xitayning Uyghur aptonom rayonidiki Uyghur we bashqa musulman az sanliq milletlerning kishilik hoquqlirigha xilapliq qiliwatqanliqigha da'ir doklatlarning endishe qozghawatqanliqini bildürüp, xitayning "Térrorchilar bilen bigunah insanlarni perqlendürüshi kérek" likini tekitligen.

U mundaq dégen: "B d t irqiy ayrimichiliqni tügitish komitétining tekshürüsh netijisi, shuningdek shinjang Uyghur aptonom rayonidiki Uyghur we bashqa musulmanlarning insan heqlirining depsendichilikke uchrawatqanliqigha da'ir doklatlar endishe qozghimaqta".

Birleshme agéntliqining qeyt qilishiche, chawush'oghlu yene "Xitayning térrorluqqa qarshi turush hoquqi bolsimu, lékin uning diniy erkinlikke, Uyghur we bashqa musulmanlarning medeniyet kimlikige hörmet qilishi kérek" likini bildürgen.

Türkiye hökümiti uzundin béri xitayning Uyghur diyaridiki basturushigha qarita özini tutuwélishqa tirishqan bolsimu, lékin u yéqinda axiri sükütini buzghan. Türkiye tashqi ishlar ministirliqi 9-féwral élan qilghan bayanatida, xitayning Uyghurlargha tutqan mu'amilisini "Insaniyetke nisbeten éghir nomus" dégen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet