Türkiye parlaménti Uyghurlarning weziyitini tekshürüsh heqqidiki teklip layihisini ret qildi

Muxbirimiz erkin
2019-06-21
Élxet
Pikir
Share
Print

Türkiye parlaménti 20‏-iyun awaz bérip, xitayning Uyghurlarni basturuwatqanliqigha qarita tekshürüsh élip bérish heqqidiki teklip layihisini ret qilghan. Mezkur teklip layihisi parlaménttiki öktichi partiye iyi partiyesi teripidin sunulghan. Teklip layihisi parlaménttiki jumhuriyet xelq partiyesi, xelqlerning démokratik partiyesining qollishigha érishken. Emma türkiyediki Uyghurlar izchil qollap kéliwatqan hakimiyet béshidiki adalet-tereqqiyat partiyesining ret qilishigha uchrighan. Közetküchilerning ilgiri sürüshiche, teklip layihisining ret qilinishida erdoghan hökümitining yéqin ittipaqdishi, türkchilik idiyesidiki milletchi heriket partiyesining awaz bermesliki hel qilghuch rol oynighan.

Bu, mezkur teklip lahiyesining türkiye parlaméntida 2‏-qétim ret qilinishidur. Bu layihe ötken yili 10‏-ayda bir qétim otturigha qoyulghan. Emma u shu qétimdimu özini "Mezlum musulmanlarning hammisi" dep kéliwatqan adalet-tereqqiyat partiyesi bilen milletchi heriket partiyesining ret qilishigha uchrighanidi. Bu teklip layihe xitay hökümiti 2 milyondek Uyghur, qazaq we bashqa musulman xelqlerni yighiwélish lagérlirigha qamap, ularning medeniyiti, tili, diniy étiqadini cheklep, Uyghur jem'iyitige qarita omumyüzlük teqiblesh élip bérip, gherb ellirining qattiq tenqidige uchrawatqan bir mezgilde sunulghanidi.

Iyi partiyesining 20‏-iyun twittérda élan qilghan bayanatida, mezkur teklip layihisining "Adalet we tereqqiyat partiyesining ret awazi bérishi, m h p ning awaz bermesliki arqisida ret qilin'ghanliqi" ni bildürülgen. Mezkur layihening prézidént erdoghan xitayni ziyaret qilish harpisida ret qilinishi diqqet qozghimaqta. 

2009‏-Yili xitayning Uyghurlargha "Irqiy qirghinchiliq" élip barghanliqini ilgiri sürgen erdoghan bu yil 7‏-ayning bashlirida béyjingni ziyaret qilip, xitay re'isi shi jinping bilen körüshidu. Türkiye taratqulirining ashkarilishiche, ikki terep xitay-türkiye iqtisadi munasiwetlirini, xitayning "Bir belwagh bir yol" qurulushida élip bérilidighan ortaq hemkarliq türlirini muzakire qilidiken.

Toluq bet