Diplomat: "Xitay Uyghurlarning basturulushigha türkiyening süküt qilishini sétiwalmaqta"

Muxbirimiz erkin
2020-08-24
Élxet
Pikir
Share
Print

"Diplomat" zhurnilida élan qilin'ghan bir maqalide xitayning Uyghurlarning basturulushigha türkiyening süküt qilishini sétiwéliwatqanliqi ilgiri sürülgen. Maqalide tekitlinishiche, Uyghurlar bilen diniy we étnik qérindashliqi bolghan türkiye dewrimizdiki eng jiddiy kishilik hoquq krizisi bolghan Uyghur mesiliside süküt qilishni tallighan mutleq köp qisim musulman döletlirining sépige qoshulghan.

"Xitay Uyghurlarning basturulushigha türkiyening süküt qilishini sétiwalmaqta" mawzuluq maqalide, özini dunyadiki "Musulmanlarning chémpiyoni" dep qaraydighan prézidént erdoghanning Uyghurlargha kelgende bu süpitini unutqanliqi tekitlen'gen.

Maqalide yene türkiye parlaméntidiki öktichiler qanun teklip layihesi sunup, Uyghur kishilik hoquq depsendichiliki tekshürüshni telep qilghanda erdoganning adalet-tereqqiyat partiyesi bilen milletchi heriket partiyesi birliship, qanun teklip layihesini ret qilghanliqi, bir öktichi parlamént ezasining "Adalet-tereqqiyat partiyesi bilen milletchi heriket partiyesi Uyghurlarni 50 milyard dollargha satti" dégenliki tekitlen'gen. Mezkur maqalini sabiq türkiye parlamént ezasi aykan erdemir bilen "Démokratiyeni qoghdash fondi" ning tetqiqatchisi filip kowaliskiy qelemge alghan.

Maqalide yene amérika xelq'ara diniy erkinlik komitétining komissari nuri türkelning sözi neqil keltürülgen bolup, uning "Burun Uyghurlarning panahgahi, dep qaralghan türkiyening xitay kompartiyesige bash égip, Uyghurlarni 3-dölet arqiliq xitaygha qayturushi eqilge sighmaydu. Türkiye Uyghurlarni qayturushni toxtitishi, panahliq tiligen barliq Uyghurlarni qoghdishi kérek" dégenliki bildürülgen. Maqalide qeyt qilinishiche, erdoganning béyjingning telipige emel qilishigha gherb meblighining türkiyedin qéchisi, uning xitay meblighige bolghan éhtiyaji türtke bolmaqtiken".

Toluq bet