Чавушоғлу: “уйғурларниң әһвали хитай билән болған һәр дәриҗилик учришишларда оттуриға қоюлмақта”

Түркийә ташқи ишлар министири мәвлүт чавушоғлу уйғур мәсилисиниң хитай билән болған һәр дәриҗилик учришишларда оттуриға қоюлуватқанлиқи, бу мәсилигә б д т вә район характерлик сәһниләрдә йеқиндин диққәт қиливатқанлиқини билдүргән. Униң илгири сүрүшичә, уйғурларниң өзи турушлуқ дөләтләрдә тинч вә хатирҗәм яшишиға капаләтлик қилиниши түркийәниң дөләт сиясити икән.

Чавушоғлу бу сөзләрни түркийәдики ийи партийә парламент әзаси исмаил оқниң униңға сунған тиләк хетигә бәргән җавабида тәкитлигән. Түркийәдики “газитә критик” намлиқ тор гезитиниң 17‏-сентәбир хәвәр қилишичә, исмаил оқ буниңдин 2 ай аввал чавушоғлуға соал тиләкчиси сунуп, йиғивелиш лагерлиридики уйғурларниң әһвали вә һөкүмәтниң бу мәсилидики мәйданини сориған.

Чавушоғлу исмаил оққа бәргән җавабида: “чәтдөләтләрдики ирқдаш вә туғқанлиримизниң алақидар дөләтләр билән һамкарлиқ асасида тил, дин вә мәдәнийитини қоғдап, тинчлиқ вә хатирҗәмлик ичидә яшишиға капаләтлик қилиниши һөкүмитимиз йолға қоюп келиватқан дөләт сияситидур. Шинҗаң уйғур аптоном районидики уйғур түрклиригә мунасивәтлик сияситимиз бу даиридә йүргүзүлмәктә. Уйғур түрклириниң әһвали, муһим мәсилиләр бойичә һәмкарлиқ ичидики хитай органлири билән һәр хил сәвийәдә күнтәртипкә кәлмәктә. Болупму б д т башчилиқидики хәлқара вә район характерлик сәһниләрдә йеқиндин диққәт қилинмақта” дейилгән.

Лекин хәвәрдә, чавушоғлу “уйғурларниң тинч вә хатирҗәм яшиши дөләт сияситимиз”, дегән болсиму, бирақ хитай һөкүмити “тәрбийәләш лагерлири” дәп келиватқан йиғивелиш лагерлирида зиялийлар, илмий тәтқиқатчилар, сәнәтчиләр вә язғучиларни өз ичигә алған милйонлиған уйғурниң тутуп турулуватқанлиқи вә хорлашқа учраватқанлиқи тәкитлинип, чавушоғлуниң бәргән җаваби тәнқидләнгән.