Chawush'oghlu: "Uyghurlarning ehwali xitay bilen bolghan her derijilik uchrishishlarda otturigha qoyulmaqta"

Muxbirimiz erkin
2019-09-18
Élxet
Pikir
Share
Print

Türkiye tashqi ishlar ministiri mewlüt chawush'oghlu Uyghur mesilisining xitay bilen bolghan her derijilik uchrishishlarda otturigha qoyuluwatqanliqi, bu mesilige b d t we rayon xaraktérlik sehnilerde yéqindin diqqet qiliwatqanliqini bildürgen. Uning ilgiri sürüshiche, Uyghurlarning özi turushluq döletlerde tinch we xatirjem yashishigha kapaletlik qilinishi türkiyening dölet siyasiti iken.

Chawush'oghlu bu sözlerni türkiyediki iyi partiye parlamént ezasi isma'il oqning uninggha sun'ghan tilek xétige bergen jawabida tekitligen. Türkiyediki "Gazite kritik" namliq tor gézitining 17‏-séntebir xewer qilishiche, isma'il oq buningdin 2 ay awwal chawush'oghlugha so'al tilekchisi sunup, yighiwélish lagérliridiki Uyghurlarning ehwali we hökümetning bu mesilidiki meydanini sorighan.

Chawush'oghlu isma'il oqqa bergen jawabida: "Chetdöletlerdiki irqdash we tughqanlirimizning alaqidar döletler bilen hamkarliq asasida til, din we medeniyitini qoghdap, tinchliq we xatirjemlik ichide yashishigha kapaletlik qilinishi hökümitimiz yolgha qoyup kéliwatqan dölet siyasitidur. Shinjang Uyghur aptonom rayonidiki Uyghur türklirige munasiwetlik siyasitimiz bu da'iride yürgüzülmekte. Uyghur türklirining ehwali, muhim mesililer boyiche hemkarliq ichidiki xitay organliri bilen her xil sewiyede küntertipke kelmekte. Bolupmu b d t bashchiliqidiki xelq'ara we rayon xaraktérlik sehnilerde yéqindin diqqet qilinmaqta" déyilgen.

Lékin xewerde, chawush'oghlu "Uyghurlarning tinch we xatirjem yashishi dölet siyasitimiz", dégen bolsimu, biraq xitay hökümiti "Terbiyelesh lagérliri" dep kéliwatqan yighiwélish lagérlirida ziyaliylar, ilmiy tetqiqatchilar, sen'etchiler we yazghuchilarni öz ichige alghan milyonlighan Uyghurning tutup turuluwatqanliqi we xorlashqa uchrawatqanliqi tekitlinip, chawush'oghluning bergen jawabi tenqidlen'gen.

Toluq bet