Түркийә уйғурларға давамлиқ көңүл бөлидикән

Мухбиримиз җәвлан
2020-10-07
Share

Анатолийә агентлиқи ториниң 7-өктәбир хәвәр қилишичә, түркийә ташқи ишлар министирлиқи 7-өктәбир ипадә билдүрүп, түркийәниң уйғур районидики кишилик һоқуқ дәпсәндичилики мәсилисигә давамлиқ көңүл бөлидиғанлиқини билдүргән.

Түркийә бу һәптә бирләшкән дөләтләр тәшкилатиниң җәмийәт, инсанпәрвәрлик, мәдәнийәт мәсилилиригә мәсул болған 3-комитетиға дөләт баянатнамиси сунуп, уйғурларниң мәдәнийәт кимлики вә мусулманлиқ салаһийитигә һөрмәт қилиш вә униңға капаләтлик қилишни тәләп қилған; түркийә мәдәнийәт министирлиқиму бу баянатнамини һәмбәһирлигән.

Бу баянатнамидә бирләшкән дөләтләр тәшкилатидики мунасивәтлик органларниң "уйғур районидики кишилик һоқуқ әһвалини хатириләш җәһәттә муһим рол ойнаватқанлиқи" тәкитлиниш билән биргә, бәзи конкрет тәклипләр оттуриға қоюлған. Бу баянатнамидә йәнә түркийәниң хитайниң земин пүтүнлүкигә һөрмәт қилидиғанлиқи, түркийәниң хәлқара җәмийәт вә хитай һөкүмитидин уйғур қатарлиқ түркий милләтләрниң башқа милләтләргә охшашла тәң-баравәр һоқуққа игә игә болуп, тинч-хатирҗәм яшишиға капаләтлик қилишини үмид қилидиғанлиқи билдүрүлгән.

Бу баянатнамидә түркийәниң б д т ислам һәмкарлиқ тәшкилати қатарлиқ хәлқаралиқ тәшкилатларниң ролидин пайдилинип, хитай билән уйғурлар мәсилиси тоғрилиқ биваситә вә үнүмлүк диалог һасил қилидиғанлиқи оттуриға қоюлған. Униңдин башқа, түркийә бу баянатнамидә бирләшкән дөләтләр тәшкилати кишилик һоқуқ кеңишиниң уйғур дияриға "роли болидиған, чәклимигә учримайдиған" зиярәт уюштурушини, хитайниңму бу мәсилидә хәлқараға ашкара болушини үмид қилидиғанлиқини билдүргән.

Түркийә ташқи ишлар министирлиқиниң баянатчиси һами ақсой 6-өктәбир баянат берип: "түркийә уйғур қериндашлиримизниң вәзийитигә изчил диққәт қилип келиватиду, бу наһайити сәзгүр мәсилә. Түркийә уйғур түрклири вә башқа мусулман милләтләрниң кишилик һоқуқи вә әркинликини һәр даим күнтәртипкә киргүзүп, хитайни диний әркинликкә һөрмәт қилишқа чақирип кәлди," дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт