Türkiye Uyghurlargha dawamliq köngül bölidiken

Muxbirimiz jewlan
2020-10-07
Share

Anatoliye agéntliqi torining 7-öktebir xewer qilishiche, türkiye tashqi ishlar ministirliqi 7-öktebir ipade bildürüp, türkiyening Uyghur rayonidiki kishilik hoquq depsendichiliki mesilisige dawamliq köngül bölidighanliqini bildürgen.

Türkiye bu hepte birleshken döletler teshkilatining jem'iyet, insanperwerlik, medeniyet mesililirige mes'ul bolghan 3-komitétigha dölet bayanatnamisi sunup, Uyghurlarning medeniyet kimliki we musulmanliq salahiyitige hörmet qilish we uninggha kapaletlik qilishni telep qilghan؛ türkiye medeniyet ministirliqimu bu bayanatnamini hembehirligen.

Bu bayanatnamide birleshken döletler teshkilatidiki munasiwetlik organlarning "Uyghur rayonidiki kishilik hoquq ehwalini xatirilesh jehette muhim rol oynawatqanliqi" tekitlinish bilen birge, bezi konkrét teklipler otturigha qoyulghan. Bu bayanatnamide yene türkiyening xitayning zémin pütünlükige hörmet qilidighanliqi, türkiyening xelq'ara jem'iyet we xitay hökümitidin Uyghur qatarliq türkiy milletlerning bashqa milletlerge oxshashla teng-barawer hoquqqa ige ige bolup, tinch-xatirjem yashishigha kapaletlik qilishini ümid qilidighanliqi bildürülgen.

Bu bayanatnamide türkiyening b d t islam hemkarliq teshkilati qatarliq xelq'araliq teshkilatlarning rolidin paydilinip, xitay bilen Uyghurlar mesilisi toghriliq biwasite we ünümlük di'alog hasil qilidighanliqi otturigha qoyulghan. Uningdin bashqa, türkiye bu bayanatnamide birleshken döletler teshkilati kishilik hoquq kéngishining Uyghur diyarigha "Roli bolidighan, cheklimige uchrimaydighan" ziyaret uyushturushini, xitayningmu bu mesilide xelq'aragha ashkara bolushini ümid qilidighanliqini bildürgen.

Türkiye tashqi ishlar ministirliqining bayanatchisi hami aqsoy 6-öktebir bayanat bérip: "Türkiye Uyghur qérindashlirimizning weziyitige izchil diqqet qilip kéliwatidu, bu nahayiti sezgür mesile. Türkiye Uyghur türkliri we bashqa musulman milletlerning kishilik hoquqi we erkinlikini her da'im küntertipke kirgüzüp, xitayni diniy erkinlikke hörmet qilishqa chaqirip keldi," dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.