Хитай даирилири хотәндә бир уйғур үстидин тутуш буйруқи чиқарған

Хитай даирилири 20‏-авғуст хотән шәһириниң тосилла йезиси маҗа кәнтидә олтурушлуқ әхмәт худабәрди үстидин тутуш буйруқи чиқарған.

Тосилла йезисиниң тутуш буйруқида, әхмәт худабәрдини тутуш һәрикитидә “төһпә қошқанлар, униң һәққидә учур билән тәминлигүчиләргә мукапат” берилидиғанлиқи, лекин униңға “ярдәм қилған, көрмәскә салған яки қанат астиға алғанларниң қануни җавабкарлиққа тартилидиғанлиқи” агаһландурулған.

Тутуш буйруқида, әхмәт худабәрди “қачқун җинайәтчи” дейилгән, бирақ униңға қандақ җинайәт билән тутуш буйруқи чиқирилғанлиқи, сотниң һөкүми йоқ туруп, униң немә үчүн “җинайәтчи” дәп аталғанлиқиға һечқандақ чүшәнчә бәрмигән.

Лекин шиветсийәдики “шәрқий түркистан тәшвиқат мәркизи” ниң илгири сүрүшичә, әхмәт худабәрди 18-авғуст тосилла йезисида хизмәт қиливатқан хитай сақчилирини өлтүрүп қачқан.

Мәзкур орун учурида йәнә, хитайниң әхмәт худабәрдини тутушқа учқучсиз айропилан чиқарғанлиқи, тутуп бәргәнләргә 300 миң, йип учи билән тәминлигүчиләргә 100 миң сом мукапат берилидиғанлиқини елан қилғанлиқини билдүргән.

Тутуш буйруқида, деһқан-чарвичиларниң қолиға калтәк, тоқмақ, гүрҗәк қатарлиқ қоралларни елип, тутуш һәрикитигә актип қатнишиши тәләп қилинған.

Хитай даирилириниң йәрлик аммини калтәк-тоқмақлар билән қоралландуруп, қачқунларни тутушқа селиши илгири уйғур кишилик һоқуқ тәшкилатлириниң қаттиқ тәнқидигә учриған иди.