Tyen'enmén meydanida weqe yüz bérip 5 kishi ölgen, 38 kishi yarilan'ghan

Muxbirimiz shöhret hoshur
2013-10-28
Share

Bügün yeni 28-öktebir küni tyen'enmén meydanida weqe yüz bérip 5 kishi ölgen we 38 kishi yarilan'ghan؛ xitay we xelq'ara xewerlerde bayan qilinishiche, chüsh mezgili sa'et 12 din 20 ötkende, ichide 3 kishi bolghan bir aptomobil, tyen'enmén meydanidiki rishatkining bir bölikige qattiq soqulghan we rishatkini bösüp ötüp piyadiler yolidiki kishilerge urulghan.

Shinxu'aning xewiride bayan qilinishiche, aptomobil rishatkigha urulghandin kéyin mashinigha ot ketken. Roytérsning xewiride bayan qilinishiche mashinigha ot kétishning aldida partlash awazi chiqqan.

Melum bolushiche, weqede aptomobildiki 3 kishi bilen birlikte jem'iy 5 kishi ölgen we 38 kishi yarilan'ghan. Weqedin kéyin saqchilar meydandiki sayahetchilerni tarqaqlashturush bilen birlikte sheherning bir qisim poyiz béketlirini taqap yoluchilar üstidin tekshürüsh élip barghan.

Bügünki axbarat élan qilish yighinida bir muxbir xitay tashqi ishlar bayanatchisidin weqening térrorluq weqesi yaki emeslikini sorighan؛ bayanatchi özining weqening tepsilatidin xewersizlikini bildürgen.

Xitayche b b s ning bu heqtiki xewiride bildürülüshiche, tyen'enmén meydani bezide xitaydiki bir qisim kishilerning öz naraziliqini ipadileydighan sehnisi bolup kelgen. 2011-Yili küzde, sot hökümige narazi bolghan bir erzdar tyen'enmén meydanidiki maw zédongning heykili aldida özige bénzin töküp ot qoyghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet