Tyenjindiki partlashtin kéyin yang chénliyang qatarliqlar nazaret astigha élindi
2015.08.18
12-Awghust tyenjin portida yüz bergen partlash weqesi seweblik, xitay bixeter ishlepchiqirish bash idarisining bashliqi yang chénliyang we ruyxey shirkitining xojayini qatarliqlar wezipisidin qaldurulup nazaret astigha élindi.
Xitayning hökümet taratquliri 18-awghust küni xitay bixeter ishlepchiqirish bash idarisining bashliqi yang chénliyang, tyenjin ruyxey shirkitining xojayini yü, qatarliq shirketning 10 neper yuqiri derijilik xadimi nazaret astigha élin'ghanliqini xewer qildi.
Weqe yüz bérip 5 kündin kéyin tyenjin'ge kelgen xitay bash ministiri li kéchyang partlashqa munasiwetlik jawabkarlarning choqum jazalinidighanliqini, partlashqa munasiwetlik mesililerning yoshurup qélinishigha yol qoyulmaydighanliqini we xelq ammisining bu jehette xatirjem bolushi kéreklikini alahide tekitligen idi.
18-Awghust küni xitay da'iriliri tyenjin portidiki partlashta hayatidin ayrilghanlarni xatirilesh murasimi ötküzgen. Xitay hökümet xewerliride 12-awghusttiki partlashta 114 ademning ölgenlikini xewer qilin'ghan bolsimu, emma ijtima'iy taratqularda weqede ölgüchilerning 1000 din ashidighanliqi ilgiri sürülmekte. Hökümet terep bilen bir qisim tor betlerni “Saxta xewer tarqitish” bilen eyiblep taqiwetken idi.