Elfidar iltebir amérika Uyghur birleshmisining yéngi nöwetlik re'islikige saylandi

Muxbirimiz qutlan
2022-05-21
Share
Elfidar iltebir amérika Uyghur birleshmisining yéngi nöwetlik re'islikige saylandi Amérika Uyghur birleshmisining yéngidin saylan'ghan re'isi elfidar iltebir we hey'et ezaliri
RFA

2022-Yili 5-ayning 21-küni amérika Uyghur birleshmisining 10-nöwetlik saylimi ötküzüldi. Elfidar iltebir mutleq köp awaz bilen amérika Uyghur birleshmisining yéngi nöwetlik re'islikige saylandi.

 Saylam komitéti buningdin birqanche hepte ilgiri amérika Uyghur birleshmisining 10-nöwetlik saylimi heqqide ijtima'iy taratqularda uqturush élan qilghan idi. Bügün, yeni 21-may shenbe küni amérika paytexti washin'gton we uninggha qoshna bolghan wirjiniye, mariland shitatliridin yighilghan Uyghur jama'iti bir yerge jem boldi, shundaqla saylam komitétining teshkillishide amérika Uyghur birleshmining 10-nöwetlik saylimini ötküzdi.

Bu qétimliq saylam neq meydanda we tor arqiliq bélet tashlash usuli bilen ötküzüldi. Saylam qizghin keypiyat hem démokratik usulda élip bérildi. Amérika Uyghur birleshmisining sabiq idare hey'et ezasi, re'is namzati elfidar iltebir mutleq köp awaz, yeni 156 bélet bilen amérika Uyghur birleshmisining yéngi nöwetlik re'islikige saylandi. Munewwer abdulla, abdughéni musa, misran dolan, quddus imam qatarliq 4 kishi amérika Uyghur birleshmisining yéngi nöwetlik idare hey'et ezasi boldi. Uningdin bashqa, amérika Uyghur birleshmisining amérikaning herqaysiy shitatlirida turushluq wekilliri élan qilindi. Nurnisa qurban amérika Uyghur birleshmisining kaliforniye shitatida, oghlan Uyghur missori shitatida, eqide ilham mishigan shitatida, rustem muhemmidow filorida shitatida, muzepper dolan téksas shitatida, memet imin nyu-york we pénsilwaniye shitatida turushluq wekili boldi.

Saylam netijisi élan qilin'ghandin kéyin, yéngi nöwetlik re'is elfidar iltebir qesem bérip wezipe tapshuriwaldi. U jama'etke qilghan sözide özining wezipe ötesh mezgilide, amérika Uyghur birleshmisining yéngi nöwetlik idare hey'et ezaliri we herqaysiy shitatlarda turushluq wekilliri bilen zich hemkarliship, pütün küchi hem zéhni bilen amérikadiki Uyghur jama'iti üchün xizmet qilidighanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet