Hindistan chégra mudapi'e qisimliri tutup qalghan 3 Uyghurning teqdiri diqqet qozghidi

D u q bu yil 6‏-ayda hindistan-xitay chégra kontrol siziqidin ötüp, ladaq etrapida hindistan chégra mudapi'e qisimlirigha tutulup qalghan 3 neper Uyghurning aqiwitige diqqet qiliwatqanliqini bildürdi. D u q bayanatchisi dilshat rishitning bildürüshiche, bu 3 Uyghurning aqiwiti qandaq bolghanliqi heqqide her xil uchurlar bar.

Hindistan axbarati, bu yil 6‏-ayning 12-küni hindistan chégra mudapi'e qisimlirining jamu-keshmirge qarashliq ladaq chégrasidiki döletbeg öldi, dégen yerge yéqin jayda abduxaliq, adil tursun we salam isimlik 3 Uyghurni tutup qalghanliqini xewer qilghan.

Tutqunlarning Uyghur tili yeken shéwiside sözlishidighanliqi, lékin terjiman bolmighachqa ularning chégradin ötüshtiki meqsiti, chégradin qandaq ötkenliki qatarliq tepsiliy uchurlarni igileshke mumkin bolmighanliqini bildürgen.

Ular jamu-keshmirdiki léx bazirigha élip bérilip, da'irilerning terjiman izdewatqanliqini ilgiri sürgen. Xewerlerde yene, tutqunlarning yurtini qaghiliq, dep tonushturghanliqi, biraq qaghiliq heqqide köp uchur bilen teminlep bérelmigenliki, weqege hindistan bixeterlik organlirining ariliship, soraq ishlirini shularning élip baridighanliqini bildürgen idi.

Dilshat rishitning ilgiri sürüshiche, bezi uchurlarda ularning xitaygha ötküzüp bérilgenliki, yene bezi uchurlarda dawamliq hindistanda tutup turuluwatqanliqi qeyt qilin'ghan.

Yéqinqi yillardin buyan Uyghur élining qaghiliq, xoten qatarliq jayliridin xitayning diniy, siyasiy bésimigha naraziliq bildürüp, Uyghurning hindistan, pakistan'gha qéchish ehwali pat-pat yüz bérip kelgen idi.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar