Yene Uyghurlar “Üch xil küch” ke qarishi meydanini ipadileshke sélindi
2017.04.29
Xitay da'iriliri Uyghur élide yolgha qoyghan atalmish “Üch xil küch” ke qarishi muraji'etname élan qilish, teshwiq qilish we qesem bérish herikitini izchillashturmaqta.
Shinjang gézitining 29 - aprél xewer qilishiche, ürümchide bu hepte ötküzülgen bir yürüsh heriketke hökümet organliridin bashqa ammiwi kublarmu qatnashturulghan.
Xitay bu heriketke “‛üch xil küch‚ ke omumyüzlük jeng élan qilish herikiti” dep nam bergen.
Bu nöwet “Heriket” ke qatnashqan organlar arisida, aptonom rayonluq adem küchi bayliqi we ijtima'iy kapalet nazariti, aptonom rayonluq sehiye sahesidin 2 - doxturxana we aptonom rayonluq Uyghur tébabet doxturxanisi, Uyghur aptonom rayonluq xelq ishlar nazariti we Uyghur élidiki tengritagh yilpizi putbol kulubi qatarliqlar bar.
Bu herikettimu asasliqi Uyghur rehberlerning siyasiysi meydanini ipadilep muraji'et élan qilishi diqqetni chékidu.
24 - Aprél aptonom rayonluq sehiye sahesidikilerning qesem bérish yighinida Uyghur tébabet doxturxanisi xojiliq bölüm bashliqi eset hashim Uyghur tébabet doxturxanisigha wakaliten meydanini ipadiligen hemde idé'ologiye sahesidiki bölgünchilikke qarshi turidighanliqi we milletler ittipaqliqini hayatini asrighandek asraydighanliqini bildürgen.
Shu küni xelq ishlar nazaritide chaqirilghan teshwiqat yighinda mezkur nazaretning naziri toxti yawqup “‛üch xil köch‚ ke qet'iy qarshi turidighanliqi, partiyening gépini anglap partiyege egishidighanliqi” ni bildürgen.
Uningdin bashqa asasliq ezaliri Uyghurlardin terkib tapqan “Tengritagh yilpizi putbol kulubi” mu 27 - apréldin bashlap Uyghur aptonom rayonluq ittipaqi komitétining4 neper Uyghur mes'uli élan qilghan “Uyghur yashlirigha 5 so'al” ni öginishke bashlighan.
“Uyghur yashlirigha 5 so'al” da Uyghur yashliri xitay dölitini söyüshke chaqirilghan we “Xitay tili bilmeslik nomus” dep körsitilgen. Bu közetküchilerning tenqidige uchrighan idi.
Xitay da'iriliri yéqindin buyan Uyghur élide atalmish “Ikkiyüzlimichilerge” ge zerbe bérish herikiti qozghighan we asasen dégüdek Uyghur serxillirini ipade bildürüshke salghan idi.