"Üch xil küch" ke qarshi meydan ipadilesh Uyghurlarni merkez qilip dawam qilmaqta

Muxbirimiz jüme
2017-05-03
Share

Ittipaq komitéti mes'ullirining Uyghur yashlirigha qilghan xitabi xelq'ara metbu'atlarda ghulghula qozghap uzun ötmey, Uyghur aptonom rayonluq xelq qurultiyining mu'awin re'isi nijat sultan ochuq xet élan qilip, atalmish " Üch xil küch" ning Uyghurlarning yüzige qara sürkewatqanliqini bildürdi.

Tengritagh torining 3-maydiki xewirige qarighanda, u, "Üch xil küch" lerning "Térrorluq", "Zorawanliq", "Aldamchiliq" heriketliri bilen "Uyghurlargha qalaq, zorawan, nadan, qara qorsaq, bimene" dégen qalpaqlarni kiydürüp qoyghanliqini bildürgen.

U yene maqaliside "Uch xil küch" lerning jem'iyet muqimliqi we milletler ittipaqliqigha éghir buzghunchiliq qilghanliqini tilgha élip, "Ular biz Uyghurlardin chiqqan munapiqlardur" dégen.

Ötken hepte Uyghur aptonom rayonluq ittipaq komitétining 4 neper Uyghur mes'uli "Uyghur yashlirigha 5 so'al" serlewhilik bir parche chaqiriq élan qilip, Uyghur élida yolgha qoyulghan barliq bixeterlik tedbirliri we Uyghurlar méhmanxanilargha chüshüshte yoluqidighan qiyinchiliqlarning hemmisige "Uch xil küch" sewebchi ikenlikini bildürgen.

Mezkur maqale xelq'ara axbaratlarda ghulghula qozghighan idi. Roytérs agéntliqi bu heqtiki xewiride, kishilik hoquq teshkilatlirining rayondiki zorluq weqelirige xitayning Uyghur medeniyitini, diniy étiqadini cheklishi, xitay köchmenlirini Uyghur rayon'gha hessilep yötkishi seweb bolghan, dep qaraydighanliqini ilgiri sürgen.

Chén chüen'go Uyghur éligha bashliq qilip yötkelgendin kéyin, Uyghur élida atalmish "Üch xil küch" ke qarshi siyasiti meydanini ipadilesh herikiti bashlighan bu heriket asasen Uyghurlarni merkez qilghan asasta hélihem dawam qilmaqta idi.

Aprélning axiri Uyghur aptonom rayonning re'isi shöhret zakir, aptonom rayonluq ijtima'iy penler akadémiyisining partkom sékrétari ablet memet qatarliqlar Uyghurlargha qarita ochuq xet élan qilghan.

Shöhret zakir xétide Uyghurlarni agahlandurup, "Uch xil küchlerning qilmishlirigha sükütte turushning, jinayetchilerni qanat astigha élish bolup hésablinidighanliqi" ni éytqan idi.

Shöhret zakirning ochuq xétige inkas qayturghan dunya Uyghur qurultiyi re'isi rabiye qadir xanim: "Qorchaq re'is shöhret zakirning bayanliri xitay hökümitining basturush obyékti Uyghurlar ikenlikini ispatlaydu" dep körsetken idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.