Xitay "Shinjang höjjetliri" din kéyin uchur kontrolluqini qattiq kücheytken

Muxbirimiz erkin
2019-12-16
Share

Uyghur aptonom rayonluq partkomning yéqinda ashkarilan'ghan "Shinjang höjjetliri" din kéyin rayonda uchur kontrolluqini qattiq kücheytip, lagérlargha da'ir sanliq uchurlarni öchürüwatqanliqi, höjjetlerni yoqitiwatqanliqi ilgiri sürüldi.

Birleshme agéntliqining bildürüshiche, yéqinda xitayning lagérlargha da'ir 403 betlik mexpiy höjjiti "Nyu-york waqti" gézitide ashkarilan'ghandin kéyin aptonom rayonluq partkom yuqiri derijilik emeldarlarni köp qétim yighin'gha chaqirip, "Shinjang höjjetliri" ning ashkarilinip kétishige qandaq inkas bildürüshni muzakire qilghan.

Xewerde, xitay hökümet xadimliri bilen alaqisi bar kishilerning sözi neqil keltürülüp, bu yighinlarda emeldarlarning weqege qandaq inkas bildürüshi munazire qilin'ghanliqi, bu xil yighinlarning washin'gtondiki "Xelq'ara tekshürüsh axbaratchiliqi instituti" ning 24 betlik mexpiy höjjiti élan qilin'ghandin kéyinmu dawam qilghanliqi bildürülgen.

Xewerde qeyt qilinishiche, Uyghur aptonom rayonluq partkom her qaysi ijtima'iy rayonlargha buyruq chüshürüp, öz tewelikidiki Uyghurlarning jümlidin tutqunlarning ehwaligha da'ir jedwellerni köydürüwétishni, ishxanilarning kompyutérlirini tashliwétishni, shundaqla lagérlargha alaqidar uchurlarni intérnétqa baghlanmighan sanliq uchur ambarlirida saqlap, tor buzghunchilirining uninggha kirishining aldini élishni telep qilghan. Xewerde yene, da'irilerning tutqunlarning qolidiki delillerni yighiwéliwatqanliqi, sabiq tutqunlardin ulargha qoyup bérilgende qoligha bérilgen uqturushni qayturup bérishni telep qiliwatqanliqi, bezi tutqunlarning öyini axturup, eger ular qeghezni tapshurmisa, "Muddetsiz qamaqqa mehkum qilish" bilen tehdit salghanliqi ilgiri sürülgen.

Xewerde qeyt qilinishiche, bezi hökümet xizmetchiliri "Shinjang höjjetliri" ni ashkarilashqa chétilip tutqun qilin'ghan. Xelq'ara taratqularda "Shinjang höjjetliri" dep atalghan xitayning lagérlar heqqidiki 24 betlik höjjitini yéqinda gollandiyediki Uyghur ziyaliysi asiya abdulehet özining ashkarilighanliqini élan qilghan. Bu höjjetler lagérlarning heqiqiy mahiyitige da'ir nurghun mexpiyetliklerni ashkarilap, xelq'arada qattiq ghulghula qozghighanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.