Уйғур кишилик һоқуқ қурулуши әнглийә һөкүмитини уйғурлар мәсилисидә берилгән тәвсийәләрни дәрһал әмәлийләштүрүшкә чақирған

Мухбиримиз ирадә
2021-07-08
Share

Әнгилийә ташқий ишлар комитети нәччә ай давамлашқан тәтқиқат вә гуваһлиқлардин кейин уйғурларниң вәзийити һәққидә бир мәхсус доклат тәйярлап әнгилийә һөкүмитигә тәклиплирини бәргән иди.

Бу мунасивәт билән уйғур кишилик һоқуқ қурулуши баянат елан қилип, әнгилийәниң борис җонсон һөкүмитини юқириқи комитетниң уйғурларни қоғдаш һәққидики тәвсийәлирини тездин йолға қоюшқа чақирған.

Мәлум болушичә, әнгилийә ташқий ишлар комитети мәзкур доклатида әнгилийә һөкүмитини парламентниң уйғурларниң ирқий қирғинчилиқ вә инсанийәткә қарши җинайәтләргә дучар болуватқанлиқи тоғрисидики қарарини қобул қилишқа вә уни ахирлаштуруш үчүн һәрикәт қоллинишқа, б д т омумий кеңиши һәм кишилик һоқуқ кеңишидә алаһидә йиғин орунлаштуруп, кишилик һоқуқ алий комиссаридин мустәқил тәкшүрүш елип беришни тәләп қилишқа чақирған.

Тәвсийәләр ичидә йәнә уйғур районида ишләпчиқирилған пахта мәһсулатлирини чәкләш, уйғур мәҗбурий әмгики мәвҗут тәминләш зәнҗирлирини тәкшүрүп бекитиш вә шундақла йәнә 2022-йиллиқ қишлиқ олимпик мусабиқисиға һөкүмәт әмәлдарлирини әвәтмәслик, тәнһәрикәтчиләр мусабиқиниң ечилиш вә йепилиш мурасимлириға қатнашмаслиқ, уйғур панаһланғучиларни тездин панаһлиқ астиға елиш қатарлиқ мәзмунларму бар икән.

Уйғур кишилик һоқуқ қурулуши 7-июл күни елан қилған баянатида юқириқи тәвсийәләрни қарши алған вә мундақ дегән: "биз борис җонсон һөкүмитини қәтий һәрикәт қилишқа чақиримиз. Бу кәң даирилик парламент доклатида көрситилгинидәк, әнгилийә ирқий қирғинчилиқ қиливатқанларни җазалашта әвзәлликкә игә. Азаб-оқубәт чәккән уйғурларға ярдәм беришниң нурғун йоллири бар. Уйғурлар әмәлий һәрикәткә толиму моһтаҗ."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт