Украиналиқлар ачарчилиқ паҗиәсиниң 82 йиллиқини хатирилиди

Мухбиримиз үмидвар
2015-11-29
Share


Украиналиқлар шәнбә күни бу дөләттә йүз бәргән ачарчилиқ паҗиәсиниң 82 йиллиқини хатирилиди.

Америка авазиниң хәвиридә ейтилишичә шәнбә күни украинаниң һәр қайси җайлиридики аммиви җәмийәтләр вә хәлқ 1932 - 1934 - йиллири арисида йүз бәргән ачарчилиқта өлүп кәткәнләргә тәзийә билдүргән.

Украина даирилири 1932 - 1934 - йиллиридики ачарчилиқниң келип чиқиш сәвәблирини әйни вақиттики сталин, молотов башлиқ совет компартийиси рәһбәрликигә артқан болуп, украина парламенти һәр йили 11 - айниң 4 - һәптиси дөләт бойичә байрақ чүшүрүп, ачарчилиқ қурбанлирини әсләшни бекиткән.

Кийев сот мәһкимиси сталин, молотов қатарлиқ бир совет компартийә рәһбәрлиригә ачарчилиқниң җавабкарлири сүпитидә җинайәт бекиткән.

Азадлиқ радиосиниң хәвәр қилишичә, украина нопус вә җәмийәт тәтқиқат институти ачарчилиқниң 82 йиллиқи мунасивити билән тәкшүрүш елип берип, шу қетимлиқ украинада йүз бәргән ачарчилиқ вәқәсидә балиларни өз ичигә алған 4 милйон адәм өлүп кәткәнликини һесаблап чиққан.

1931 - 1933 - Йиллири арисида коллектиплаштуруш һәрикити нәтиҗисидә ачарчилиқ қазақистандиму еғир дәриҗидә йүз бәргән болуп, қазақистан тарихчилири қазақистанда икки милйон адәмниң ачлиқтин өлгәнликини һесаблап чиққан иди. Шу қетимлиқ ачарчилиқта йәттису районидики уйғурлардинму көп адәм өлгән вә көп сандики уйғурлар, қазақлар вә башқа хәлқләр қошна или, чөчәк районлириға қечип келип маканлашқан иди.

Ачарчилиқ йәнә беларусийә вә кавказийә районлиридиму йүз бәргән икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт