Украинанда ленинниң һәйкили давамлиқ йиқитилмақта

Мухбиримиз үмидвар
2015-04-18
Share


17 - Април күни бир қисим йүзигә маска тақиған кишиләр украинаниң шәрқидики харков шәһиридики сабиқ совет иттипақи даһийси владимир ленинниң икки һәйкилини йиқитқан .

Русийә тор бәтлиридин "сенсор.Нет"ниң хәвәр қилишичә, бу адәмләр украина һөкүмитиниң контроллуқи астидики мәзкур шәһәргә җайлашқан икки университет ичидики ленинниң һәйкилиниң бойниға арғамча селип, тартип, һәйкәлни йиқитқан.

17 - Април күни йәнә русийәпәрәс күчләрниң контроллуқидик луганск областидики бир йезиға тикләнгән ленинниң һәйкилигә украина дөлитиниң бәлгиси болған сериқ вә йешил рәң чечилип, арқидин йиқитилған.

Мундақ, ленин һәйкилини йиқитиш русийәпәрәс күчләр билән украин милләтпәрвәрлириниң арисидики зиддийәтниң ипадисигә айланған болуп, шәрқий украинадики йәнә бир шәһәр украина армийәсиниң қолидики вақтида йиқитилған ленин һәйкили, бу шәһәр русийәпәрәс күчләрниң қолиға өткәндә русийәпәрәс күчләр тәрипидин қайтидин тикләнгән.

Украинаниң һәр қайси җайлирида ленин һәйкилини йиқитиш вәқәлири өткән йили украина кризисиниң күчийиши җәрянида көпләп йүз бәргән иди.

Алдинқи һәптидә, йәни 9 - април күни украина парламенти натсислар вә коммунистик партийәниң бәлгилири вә идийәлирини чәкләйдиған һәмдә кимки бу қанунни бузса 5 - йилидин 10 йилғичә қамақ җазасиға мәһкум қилинидиған бир қанун лайиһисини қобул қилған иди.

Мәлум болушичә, коммунистлар шәрқий украинадики русийәпәрәс бөлгүнчи күчләрниң асаслиқ қоллиғучилири һесабланған.

Русийә мәтбуатлириниң хәвәр қилишичә, әслидә украина ленин һәйкили әң көп орнитилған җумһурийәт болуп, 1991 - йилиғичә болған арилиқта пүтүн украинда 1500 дин артуқ ленин һәйкили орнитилған икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт