NATO Русийә мәсилисидә қаттиқ ипадә билдүрди

Мухбиримиз әзиз
2022-03-23
Share

Русийә һөкүмитиниң украинадики урушқа ядро қораллирини ишқа салмақчи болуватқанлиқи һәққидики хәвәрләр оттуриға чиққандин кейин “шималий атлантик әһди тәшкилати” (NATO) буниңға кәскин инкас қайтурди.

Ройтерс агентлиқиниң 23-марттики хәвиридә ейтилшичә, NATO ниң баш секретари җенс столтенберг (Jens Stoltenberg) шу күни нутуқ сөзләп: “биз русийәниң һуҗумлирини чекиндүрүш үчүн шәрқий явропада көп дөләт қошунлири тәсис қиливатимиз. Русийә ядро қоралини ишлитипла бу урушта йеңип чиқимиз, дәп хам хиял қилмисун” дегән. Шуниңдәк NATO ниң давамлиқ һалда өзлириниң “дости” болған украинани керәклик ярдәмләр билән тәмин еетидиғанлиқини, әмма буниң һәргизму русийә билән NATO оттурисидики қаршилиқниң мәзмуни әмәсликини тәкитлигән. Мәлум болушичә NATO ниң шәрқий явропадики һәрбий орунлаштурмисида зор тәңшәш тез сүрәттә ишқа ашқан.

BBC Ниң 23-марттики хәвиридә ейтилишичә, NATO ниң баш секретари җенс столтенберг өзлириниң хитайдин әнсирәватқанлиқини алаһидә тәкитлигән. У бу һәқтә қилған сөзидә: “хитай русийәни сиясий ярдәм билән тәмин етип келиватиду. Шуниң билән биргә ашкара ялғанларни вә хата учурларни көпләп тарқитиватиду” дегән. Хәвәрдә ейтилшичә NATO һазир хитайниң русийәни маддий ярдәм билән тәмин етишидин вайим йемәктә икән.

Украина президенти зелениский америка дөләт мәҗлисидә видийо арқилиқ нутуқ сөзләп, америка һөкүмитидин техиму көп ярдәм тәләп қилған иди. Мәзкур тәләп бойичә америка президенти җов байден 23-март күни чүштин бурун 800 милйон америка доллирилиқ һәрбий ярдәм буюмлириниң дәсләпки қәдәмдә украинаға йетип кәлгәнликини билдүргән. Арқидинла явропа иттипақиниң, җүмлидин әнглийә вә франсийәниң техиму көп һәрбий ярдәм беришкә тәйярлиниватқанлиқи мәлум болушқа башлиди. Әмма хитайниң украинани һемайә қилиш үчүн һасил болуватқан дунявий сәптин изчил өзини чәткә ‍елиши нөвәттә хәлқара үчүн бир чоң баш ағриқи болмақта икән.

Бирләшкән дөләтләр тәшкилати (б д т)ниң 49-нөвәтлик кишилик һоқуқ кеңиши йиғинида хитай вә русийә изчил һәрқайси дөләтләрниң тәнқид обйекти болған. 21-Күни йиғин һәйитигә тапшурулған баянатида франсийәниң б д т да даимий турушлуқ баш әлчиси җером боннафонт (Jérôme Bonnafont) русийәниң һәрбий таҗавузи вә хитайниң уйғур дияридики түрлүк зулумлирини баравәр тилға алған. У бу һәқтә қилған сөзидә ташполат тейип, илһам тохти қатарлиқ уйғур сәрхиллирини алаһидә мисал қилған һалда һәр икки җайдики қирғинчилиқ қилмишлириниң нөвәттә техиму юқури пәллигә чиқиватқанлиқини тәкитлигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт