Ukra'ina sherqiy rayonlardiki moskwaperes küchlerge ultimatum tapshurdi

Ukra'ina charshenbe küni sherqiy ukra'inadiki kiyéf hökümitige qarshi moskwaperes küchlerge ultimatum tapshurup, 48 sa'et ichide söhbet ötküzmise, mesilini qoralliq hel qilidighanliqini agahlandurdi.

Ukra'ina ichki ishlar ministiri awakof, mesilini siyasiy yol arqiliq hel qilish mumkinchiliki dawamliq mewjut, biraq ukra'ina parakendichilik peyda qilishqa urunuwatqanlargha qattiq inkas qayturidu, dégen.

Moskwaperes küchler ukra'inaning sherqidiki donétsk, xarkof, luxanisk qatarliq sheherlerning hökümet binalirini ishghal qilip, rusiyege qoshulup kétishni telep qilghan.

Da'iriler seyshenbe küni xarkof sheherlik hökümet binasini ishghal qiliwalghan küchlerni qolgha alghan. Da'iriler yene, charshenbe küni luxanisk sheherdiki dölet amanliq binasini ishghal qiliwalghan isyanchi küchlerning binadin chiqip kétishige yol qoyghan. Biraq isyanchilar donétsk sheherlik hökümet binasini dawamliq ishghal qilip turmaqta iken.

Amérika dölet ishlar ministiri jon keriy seyshenbe küni rusiye alahide xizmet xadimliri we alahide heriket qisimlirining sherqiy ukra'inada bölgünchilik isyanigha qutratquluq qiliwatqanliqini bildürgen. Sh a o e t, rusiye okra'inagha mudaxile qilsa, éghir bedel töleydighanliqini agahlandurghan.