Уйғур аптоном районлуқ сотта өлүмгә буйрулған вә кейин ақланған бир хитай пуқраси төләмгә еришти

Мухбиримиз ирадә
2018.02.01
Share on WhatsApp
Share on WhatsApp

1997‏-Йили или вилайәтлик оттура сот мәһкимиси тәрипидин өлүм җазасиға буйрулған, әмма кейин ақлинип түрмидин қоюп берилгән җу йүән икки милйон йүән, йәни 300 миң доллардин артуқ төләм пулиға еришкән.

“сәйшин” ториниң бу һәқтики хәвиридин мәлум болушичә, җу йүән исимлик хитай яш әйни чағда “басқунчилиқ, қәстән адәм зәхимләндүрүш” қатарлиқ җинайәтләр билән әйиблинип қолға елинған вә сақчиларниң қаттиқ-қейин қистақлириға учриған. У мәзкур тор гезитигә қилған сөзидә әйни чағда өзиниң қийнақ азабиниң чидиғусизлиқидин ахири иқрар қилишқа мәҗбур болғанлиқини ейтқан. Әйни чағда сот мәһкимиси һечқандақ бир дәлил-испат болмиған бир шараитта пәқәт униң иқрарнамисигә тайинип турупла униңға кечиктүрүлүп иҗра қилинидиған өлүм җазаси бәргән. 

Бирақ, сақчилар бир йилдин кейин ху юң исимлик йәнә бир хитайни қолға алған. Хо юң юқирида җу йүәнгә артилған җинайәтләрни өзиниң қилғанлиқини етирап қилған вә у бу сәвәблик 1999йили өлүм җазасиға һөкүм қилинип иҗра қилинған. Җу йүәнгә берилгән өлүм җазаси 2000‏-йили муддәтсиз қамаққа өзгәртилип, 2011‏-йили 15 йилға қисқартилған. Андин 2012-йили түрмидин қоюп берилгән.

Җу йүән қоюп берилгәндин кейин, өзиниң наһәқ җазалиниши сәвәблик хитай алий сот мәһкимисигә әрз қилған вә аридин икки йил өткәндин кейин, йәни 26-январ дүшәнбә күни даириләр униңға 300 миң доллардин артуқ төләм бәргән. Бирақ, җу йүән өзиниң бу төләм билән болди қилмайдиғанлиқини, әйни чағда өзиниң наһәқ солинишиға сәвәбчи болған сақчиларниң җазалинишини тәләп қилидиғанлиқини билдүргән. Или вилайәтлик сақчи даирилири болса делодики қейин-қистақ мәсилиси үстидә тәкшүрүш елип бармақтикән. 

Мәзкур вәқә чәтәлләрдики уйғур көзәткүчиләрниң күчлүк диққитини қозғиди. Улар буни райондики хитай пуқралири билән уйғурлар арисидики сиясий һоқуқниң рошән селиштурмиси, дәп көрсәтти. Уларниң көрситишичә, 2009-йилидики үрүмчи вәқәсиниң алди вә кәйнидә сәвәбсиз түрмигә қамалған нурғун уйғур яшлири бар болсиму, уларниң һечқайсиси ақлиниш яки төләмгә еришиш дегәндәкләрниң һечбиридин бәһримән болалмиған. Улар йәнә нөвәттә уйғур елидики “йепиқ тәрбийиләш мәркәзлири” диму йүзмиңлиған уйғурниң бигунаһ солаққа солиниватқанлиқини әскәртип өтти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт