Уйғур елида үндидардики “достлар чәмбирики” ни етивәткәнләр яки етивәтмәкчи болғанларниң сани көпәймәктикән

Хәлқ тори уйғурчә қанилиниң 1-авғусттики хәвиригә қариғанда, уйғур аптоном районида үндидардики “достлар чәмбирики” ни етивәткән яки етивәтмәкчи болғанларни сани көрүнәрлик ашмақтикән.

Игилинишичә, хәлқ тори йеқинда уйғур аптоном районидин үндидардики “достлар чәмбирики” ни ишлитиватқан 2000 кишини зиярәт қилғанлиқи мәлум.

Тәкшүрүш нәтиҗисидин мәлум болушичә, 35.8 Пирсәнт зиярәт қилинғучи үндидардики “достлар чәмбирики” етивәткән яки етивәтмәкчи болғанлар икән.

Хәвәрдә үндидардики “достлар чәмбирики” ни етивәткән яки етивәтмәкчи болғанларниң көпинчисиниң елан учурлиридин бизар болғанлиқи яки үндидарниң хизмәт, турмуш вә өгинишкә сәлбий тәсир елип кәлгәнлики тилға елинған. Әмма униңдики бир қисим сәзгүр сиясий сәвәбләр пәқәтла тилға елинмиған.

Әҗәблинәрлики шуки, хәлқ тори елан қилған мәзкур хәвәрдә үндидардики “достлар чәмбирики” ни тақивәтмәкчи болғанларға әң яхшиси уни давамлиқ ишлитиш вә һазирқи учур дунясиниң әвзәлликидин пайдилиниш тәклипи тәвсийә қилинған.

Чәтәлләрдики көзәткүчиләр билән сиясий анализчилар уйғур аптоном районида үндидарни ишлитидиғанларниң, болупму үндидардики “достлар чәмбирики” гә әза болғанлар саниниң йеқиндин буян җиддий рәвиштә пәскойға чүшүши тор сақчилириниң қаттиқ сензори билән мунасивәтлик, дәп қаримақта.

Радийомиз өткән йилидин буян уйғур елиниң һәрқайси җайлирида көплигән яшларниң үндидарда диний мәзмундики яки сәзгүр сиясий темилардики учурларни көргәнлики сәвәблик тутқун қилинғанлиқиға даир нәқ мәйдан хәвәрлирини аңлатқан иди.