"Ündidar hemmini közitip turuwatidu"

Muxbirimiz sada
2019-06-26
Élxet
Pikir
Share
Print

Yéqindin buyan xitayda peyda bolghan qol téléfon yumtallirining kishilerni 24 sa'et nazaret qilish we shexsiy uchur igilesh iqtidarining barliqi heqqide köp munaziriler we maqaliler otturigha chiqqan idi. Yéqinda xitayda turuwatqan bir chet'ellik "Ündidar" ning kishilerning shexsiy uchurini qandaq oghrilaydighanliqini tepsiliy chüshendürüp bir parche maqale élan qilghan.

Barkléy brem imzasida yézilghan "Ündidar hemmini közitip turuwatidu" namliq bu maqalide aptor etigen qanchide ornidin turghanliqi, kimning "Ündidar" arqiliq uninggha uchur yazghanliqi we uning kimge uchur qayturghanliqi we néme déyishkenliki qatarliq özidin bashqa ademning bilishi mumkin bolmaydighan uchurlarning hemmisi "Ündidar" arqiliq süzüwélinidighanliqini nuqtiliq bayan qilghan.

Aptor maqaliside yene kündilik turmushtiki öy ijarisi we tok-su pulini tölesh qatarliq ishlarni "Ündidar" arqiliq qilghanliqtin "Ündidar" ning uning banka hésabat nomuri, öyning adrési qatarliq nazuk uchurlardinmu toluq xewerdar ikenlikini chüshendürüp ötken. Téximu qiziq yéri "Ündidar" aptorning etigende qandaq qehweni ichidighanliqinimu bilidiken.

Aptorning déyishiche, adette kishiler yan téléfonigha qarap meshghulat qilghanliqtin "Ündidar" shu kishining téléfonidiki kamérasi arqiliq yüzini toniyalaydiken. Netijide kishilerning yüz süriti intayin roshen halette sandanda saqlinip turidiken. Uningdin bashqa "Ündidar" yan téléfonning yangratqusi arqiliq kishilerning dégen herbir söz-jümlisini anglap turalaydiken.

Ilgiri élan qilin'ghan bezi doklat we xewerlerde Uyghur diyaridiki jaza lagérigha solan'ghan kishilerning köpinchisining hökümetke paydisiz héchqandaq bir heriket bilen shughullanmighan turupmu yenila tutqun qilin'ghanliqi ilgiri sürülgen idi. Közetküchiler bu heqte pikir yürgüzüp, kishilerning herbir söz-herikitining emeliyette "Ündidar" teripidin nazaret qilinidighanliqi, xitay hökümiti mushu yumtal arqiliq özige qarshi birer gep-sözde bolghan kishiler heqqide uchur toplaydighanliqini bildürdi.

Toluq bet