Xitay emeldar bir qisim Uyghur partiyelik kadirlarni “Étiqad hayankeshliri we asiyliri” dep tenqidlidi

Xitay emeldar Uyghur partiyilik kadirlarni islamgha qarshi ashkara pozitsiye bildürüshke dewet qildi.

Uyghur aptonom rayonluq xelq qurultiyi da'imiy komitétning axbarat ishliri bashqarmisining mu'awin bashliqi jow gu bügün ürümchi sheherlik xelq hökümitining tor bétide élan qilghan bir maqaliside bir qisim partiyelik Uyghur kadirlarni “Étiqad hayankeshliri” we “Étiqad asiyliri” dep eyibligen.

U maqaliside “Az sanliq millettin bolghan bir qisim partiyilik kadirlarning marksizmning heqiqitige, xitay kompartiyisining ulughluqigha we sotsiyalizmning ewzellikige qelbidin ishenmeydighanliqi, ularning peqet menpe'et üchünla partiyelik markisini kötürüp yüridighanliqi” heqqide qaqshighan.

Bu türdiki kadirlarning éghizidin “Allagha shükür” dégendek sözlerni chüshermeydighanliqi, diniy zatlargha heddidin ziyade hörmet qilip kétidighanliqi we pénsiyige chiqqanda özini azadliqqa chiqqandek hés qilidighanliqini bayan qilghan mezkur emeldar, az sanliq millet partiyilik kadirlirining diniy mesilide meydani éniq bolushini, “Özini men marksizmchi déyelishi we musulman emeslikini jakarliyalishi” her yerde kéreklikini ilgiri sürdi.

Muhajirettiki Uyghur közetküchiler xitay da'irilirining partiye ichidiki Uyghur kadirlarni musulmanliqtin ashkara yüz örüshke qistawatqanliqini perez qilishmaqta. Korla sheherlik partkom birliksep bölümining bashliq enwerjan eysa, tünügün bir maqale élan qilip “Özining islam dinigha qarshi pozitsiyesi” ni ashkara jakarlighan idi.