Үрүмчи әтрапидин байқалған зор көләмдики көмүр кан газ мәнбәсини ечиш башланди

Мухбиримиз үмидвар
2018-02-04
Share

Хитай даирилири үрүмчи йенидики даванчиң районидин байқалған көмүр қатлими газлиқини җиддий ечишқа киришкән. Техи йеқиндила даванчиң районидин 100 милярд куб метир көмүр қатлими гази записи байқалғанлиқи хәвәр қилинған болуп, 31-январ күни уйғур дияридики төт чоң ширкәт даванчиңдики мәзкур көмүр қатлими газ мәнбәсини бирлишип ечиш һәққидә келишим имзалап, ишқа киришкән.

Тәңритағ ториниң хәвәр қилишичә, уйғур аптоном районлуқ көмүр кан геологийә идариси даванчиңдин байқалған мәзкур көмүр қатлими газиниң пакизлиқ дәриҗисиниң юқирилиқи вә униңдики химийилик мадда метан тәркибиниңму 90% артуқ икәнликини бекиткән. Хитай даирилири байқиған мәзкур газлиқ боғда теғиниң җәнуби етикигә, йәни үрүмчидин 90 километирлар нериға җайлашқан болуп, газлиқниң җәнубтин-шималға болған кәңлики 27 километир келидикән. Мәзкур көмүр қатлими газлиқиниң омуми записиниң 100 милярд куб метирдин артуқ икәнлики, уни 15-20 йил қезиш һәмдә 300 миң аһалини газ билән тәминләш мумкин икәнлики тәхмин қилинмақта.

Нөвәттә, уйғур дияри хитайниң асасий тәбиий газ мәнбәсигә айланған болуп, хитайниң уйғур дияриниң тарим вадисидин байқиливатқан тәбиий газ мәнбәлирини ечип, уни хитайниң шәрқидики деңиз бойлиридики 13 өлкә вә биваситә қарашлиқ шәһәрләрдики 400 милйондин артуқ аһалини тәминләватқанлиқи мәлум. 13 Йил ичидә хитай һөкүмити тарим вадисидин 200 милярд куб метир тәбиий газ тошуп кәткән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт