Ürümchi shehirining hawa qatnishi eslige keltürülmekchi

Muxbirimiz eziz
2022.11.29

Xitay hökümiti bashqurushidiki “Xitay xewer tori” ning 29-noyabirdiki xewiride éytilishiche, xitay da'iriliri ürümchi shehiridin xitayning jéngju, changsha, lenju, xeyku qatarliq herqaysi sheherlirige qatnaydighan ayropilanlarning 30-noyabirdin bashlap normal uchushni eslige keltüridighanliqini jakarlighan. Xewerde téximu köp hawa qatnishi yollirining eslige keltürülüsh aldida turuwatqanliqi alahide tekitlinish arqiliq nöwettiki weziyetning tedrijiy ongshiliwatqanliqi ishare qilin'ghan. “Shinjang géziti” ning bu heqtiki xewiride bolsa ürümchi shehiridiki “Yuqum xewpi töwen bolghan rayonlar” diki ahalining kocha aptobuslirigha olturup öz rayoni teweside sodiliq we bashqa ishlarni béjirse bolidighanliqi, emma rayon atlashqa hazirche yol qoyulmaydighanliqi tekitlen'gen.

Bu yéngi tedbirning otturigha chiqishi ürümchi shehiridiki “24-Noyabir ot apiti” ni pilta qilghan köp qétimliq xelq namayishining partlishi hemde namayishlar jeryanida wirus yuqumini kontrol qilishtiki qamal tedbirlirini bikar qilish chuqanlirining kötürülüshidin kéyinki peytke toghra kelgen. Shu sewebtin bu yéngi tedbirning élan qilinishi bilen nöwettiki jiddiy naraziliqni peskoygha chüshürüsh chariliri otturisida melum baghlinishning barliqi toghrisidiki qismen texminlermu ijtima'iy taratqulardin orun élishqa bashlighan.

Halbuki xitay merkiziy siyasiy-qanun komitéti chaqirghan 29-noyabirdiki yighinda xitay kompartiyesi 20-qurultiyining rohini qet'iy izchillashturush, shuningdek döletning bixeterliki we jem'iyetning muqimliqini qet'iy qoghdash mesilisi alahide tekitlen'gen. Pütkül xitayning qanun sahesidiki xizmetlerge yétekchilik qilidighan mezkur komitétning bu xil mewqesi xitay merkiziy hökümitining wirus yuqumini kontrol qilish heqqidiki bash qarari hemde uning ijra qilinish charilirining hazirche emeldin qaldurulmaydighanliqidin bésharet bergen. Ürümchi sheherlik hökümetning bu heqtiki qararidimu éniq qilip “Gerche ürümchi shehirining yuqumni nölge chüshürüsh xizmiti asasiy jehettin emelge ashqan bolsimu yuqumning xewpi dawamliq mewjut bolup turmaqta. Shunga partiye merkiziy komitétining yuqumni kontrol qilish xizmiti heqqidiki orunlashturushlirini qet'iy izchillashturimiz” déyilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.