Xitayning ürümchi nopusini 10 milyon'gha yetküzidighanliqi ilgiri sürüldi

Muxbirimiz erkin
2019.06.17

Xitay hökümitining ürümchi nopusini 10 milyon'gha yetküzüshni pilanlighanliqi ilgiri sürülmekte. Ürümchi sheherlik olturaq öy we öy-mülk bashqurush idarisining yéqinda chüshürgen bir uqturushida, xitay da'irilirining 2020‏-yili ürümchi shehirining nopusini 10 milyon'gha, ürümchi shehirining kölimini 800 kwadrat kilométirgha yetküzüshni pilanlighanliqi ashkarilandi.

Bu pilan sheherlik olturaq öy we öy-mülk bashqurush idarisining 14‏-iyun küni yighin chaqirip, yuqiriqi pilanni qandaq ishqa ashurushni muzakire qilish heqqide ürümchidiki her qaysi soda jem'iyetlirige we karxanilargha ewetken uqturushida tilgha élin'ghan. Uqturushta: “Bir belwagh bir yol teshebbusining dawamliq chongqurlishishigha egiship, shinjangning yipek yoli iqtisadi belwéghidiki merkizi rayonluq roli künséri gewdilik ipadilenmekte. Ürümchi shehiri shinjang Uyghur aptonom rayonining merkizi bolush süpitide 2018‏-yili chiqarghan 269‏-nomurluq ‛nopus orunlashturush siyasitini ilgirilep emeliyleshtürüsh toghrisidiki uqturushi‚ gha asasen sheher nopusining kéngiyishini tézlitip, 2020‏-yili sheher nopusini 10 milyon'gha, sheher kölimini 800 kwadrat kilométirgha kéngeytishtek istratégiyilik nishanni ishqa ashurush telep qilinmaqta” déyilgen. 

Uqturushta qeyt qilinishiche, da'iriler bu istratégiyilik nishanni ishqa ashurushni muzakire qilish üchün ürümchi shehiridiki karxana, shirketlerni 14‏-iyun küni söhbet yighinigha chaqirip, öy-mülk bazirining tereqqiyatini algha sürüsh, uni qayta janlandurushni muzakire qilishni qarar qilghan. Uqturushta yene her qaysi uyushma we karxanilarning alaqe supisi qurup, ürümchi shehirini waqtida, etrapliq meblegh sélish uchuri bilen teminlishi üchün bu yighin'gha teklip qilin'ghanliqi tekitlen'gen. 

Xitayning nöwettiki resmiy nopus statistikilirida ürümchi shehirining resmiy nopusi 2 yérim milyondin artuq körsitilgen. Xitay da'irilirining bir yil ichide qandaq qilip uning nopusini 10 milyon'gha yetküzidighanliqi melum emes. Bezi közetküchilerning ilgiri sürüshiche, uning üstige amérika-xitay soda urushi keskinliship, xitay iqtisadi we uning bir belwagh bir yol istratégiyisi éghir xirisqa duch kelgen bir waqitta uning bu pilanni emelge ashurushi téximu müshkül iken.

Közetküchiler, emeliyette sheherlik öy bashqurush idarisining bu uqturushi xitayning Uyghur rayonidiki öy-mülk tereqqiyati jiddiy xirisqa duch kéliwatqanliqini ashkarilap béridu, dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.