Хитайниң үрүмчи нопусини 10 милйонға йәткүзидиғанлиқи илгири сүрүлди

Мухбиримиз әркин
2019.06.17

Хитай һөкүмитиниң үрүмчи нопусини 10 милйонға йәткүзүшни пиланлиғанлиқи илгири сүрүлмәктә. Үрүмчи шәһәрлик олтурақ өй вә өй-мүлк башқуруш идарисиниң йеқинда чүшүргән бир уқтурушида, хитай даирилириниң 2020‏-йили үрүмчи шәһириниң нопусини 10 милйонға, үрүмчи шәһириниң көлимини 800 квадрат километирға йәткүзүшни пиланлиғанлиқи ашкариланди.

Бу пилан шәһәрлик олтурақ өй вә өй-мүлк башқуруш идарисиниң 14‏-июн күни йиғин чақирип, юқириқи пиланни қандақ ишқа ашурушни музакирә қилиш һәққидә үрүмчидики һәр қайси сода җәмийәтлиригә вә карханиларға әвәткән уқтурушида тилға елинған. Уқтурушта: “бир бәлвағ бир йол тәшәббусиниң давамлиқ чоңқурлишишиға әгишип, шинҗаңниң йипәк йоли иқтисади бәлвеғидики мәркизи районлуқ роли күнсери гәвдилик ипадиләнмәктә. Үрүмчи шәһири шинҗаң уйғур аптоном райониниң мәркизи болуш сүпитидә 2018‏-йили чиқарған 269‏-номурлуқ ‛нопус орунлаштуруш сияситини илгириләп әмәлийләштүрүш тоғрисидики уқтуруши‚ ға асасән шәһәр нопусиниң кеңийишини тезлитип, 2020‏-йили шәһәр нопусини 10 милйонға, шәһәр көлимини 800 квадрат километирға кеңәйтиштәк истратегийилик нишанни ишқа ашуруш тәләп қилинмақта” дейилгән. 

Уқтурушта қәйт қилинишичә, даириләр бу истратегийилик нишанни ишқа ашурушни музакирә қилиш үчүн үрүмчи шәһиридики кархана, ширкәтләрни 14‏-июн күни сөһбәт йиғиниға чақирип, өй-мүлк базириниң тәрәққиятини алға сүрүш, уни қайта җанландурушни музакирә қилишни қарар қилған. Уқтурушта йәнә һәр қайси уюшма вә карханиларниң алақә суписи қуруп, үрүмчи шәһирини вақтида, әтраплиқ мәбләғ селиш учури билән тәминлиши үчүн бу йиғинға тәклип қилинғанлиқи тәкитләнгән. 

Хитайниң нөвәттики рәсмий нопус статистикилирида үрүмчи шәһириниң рәсмий нопуси 2 йерим милйондин артуқ көрситилгән. Хитай даирилириниң бир йил ичидә қандақ қилип униң нопусини 10 милйонға йәткүзидиғанлиқи мәлум әмәс. Бәзи көзәткүчиләрниң илгири сүрүшичә, униң үстигә америка-хитай сода уруши кәскинлишип, хитай иқтисади вә униң бир бәлвағ бир йол истратегийиси еғир хирисқа дуч кәлгән бир вақитта униң бу пиланни әмәлгә ашуруши техиму мүшкүл икән.

Көзәткүчиләр, әмәлийәттә шәһәрлик өй башқуруш идарисиниң бу уқтуруши хитайниң уйғур районидики өй-мүлк тәрәққияти җиддий хирисқа дуч келиватқанлиқини ашкарилап бериду, дәп қаримақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.