Ürümchi sheherlik hökümet “Qatnashni échish” heqqide qarar alghan

Xitay hökümiti bashqurishidiki “Shinjang géziti”ning 27-noyabirdiki xewiride éytilishiche, ürümchi shehridiki tömüryol, awi'atsiye we ammiwi qatnash aptobuslirigha qarita ijra qiliniwatqan “Toxtitip qoyush” charisining tedriji emeldin qaldurilidighanliqi élan qilin'ghan.

Xewerde éytilishiche, shu küni ürümchi sheherlik hökümetning axbarat ishxanisi uqturush chiqirip: “Nöwettiki wirusni kontrol qilish weziyitide qolgha keltürülgen netijilerni uniwérsal bahalash arqiliq ürümchi sheherlik wirusni kontrol qilish qomandanliq ishxanisi shuni qarar qildiki, 28-noyabirdin bashlap wirusni kontrol qilish tedbirlirini qattiq ijra qilghan aldinqi shert astida hawa, tömüryol, taksi we aptobus qatnishi tedriji eslige keltürülidu” dep élan qilghan.

Emma xitay hökümitining wirus yuqumi heqqidiki uchurlirida körülüwatqan köpligen ziddiyetlik melumatlar her sahening bu mesilige bolghan küchlük gumanlirini qozghap kéliwatqanliqi melum. “Washin'gton pochtisi” gézitining 27-noyabirdiki obzor maqaliside éytilishiche, ikki kün ilgiri ürümchi shehiridiki da'iriler bir qisim olturaq rayonlarda yuqum xewpining töwen ikenlikini jakarlighan hemde bir qisim rayonlarni échiwétish heqqide qarar chiqarghan. Emma ürümchidiki bashqa köp qisim rayonlarda wirusqa qarshi türlük tedbirler dawamliq qattiq qolluq bilen ijra qilin'ghan hemde bu jaylarda hazirche wirusqa qarshi charilerning bikar qilinmaydighanliqini bildürgen.

Nöwette xitaydiki ijtima'iy taratqularda xitay hökümitining wirusni kontrol qilishigha munasiwetlik köpligen widiyolar tarqilip yürgen bolup, “Qatnashni eslige keltürüsh” charisi “Xelq ammisining nöwettiki hökümetke bolghan ghezipini bésish tedbirlirining biri bolushi mumkin” dégen texminler otturigha chiqiwatqanliqi melum.