Ürümchi shehiride 33 yerde "Yighiwélish lagéri" ning barliqi algha sürülmekte

Muxbirimiz eziz
2018-04-23
Élxet
Pikir
Share
Print

Uyghur diyarida barghanséri yuqiri pellige chiqiwatqan "Yépiq shekillik terbiyilesh" dolqunida milyonlighan Uyghurlarning bu lagérlargha solan'ghanliqi melum. Emma rayonda zadi qanchilik sanda "Terbiyilesh lagéri" ning tesis qilin'ghanliqi téxiche namelum.

Yéqinda "Cheklen'gen xewerler" torida élan qilin'ghan bu heqtiki bir uchurda "Ürümchi shehiride 33 orunda mushu xildiki yighiwélish lagéri tesis qilin'ghan," dep körsitilgen. Xewerde éytilishiche, hazir siliqlashturup "Siyasiy terbiyilesh merkizi" dep atiliwatqan orunlarda dölet memuriy xadimlirining, hökümet "Chékit urup qoyghan" barliq shexslerning shundaqla diniy étiqadqa chétishliq kishilerning méngisini yuyush xizmiti jiddiy dawam qilmaqta iken. Shunga ular bu orunlarni tilgha alghanda "Terbiyilesh merkizi" déyishning ornigha "Yighiwélish lagéri" dégen sözini qollan'ghan. Shuning bilen birge chén chu'en'go "Milyon'gha yéqin kishini görüge éliwélip, pütkül shinjangni üsti ochuq türmige aylandurup boldi," déyilgen.

Xewerde éytilishiche, nöwette Uyghur diyaridiki barliq sheher, nahiye we yézilarghiche omumlashqan "Siyasiy jehettin terbiyilesh", qatmu-qat tekshürüsh nuqtiliridin ötüsh, qedemde bir kimlik tekshürüsh qatarliq "Bixeterlik tedbirliri" ni ijra qilish jeryanida chén chu'en'go bashchiliqidiki "Qan shorighuchi guruh" qa nepretlinip kéliwatqan dölet memuriy xadimlirini "Fashistik tüzüm sewebidin ziyankeshlikke uchrighuchidin bashqilargha ziyankeshlik qilghuchilargha aylanmaqta," dep körsitidu.

Uyghur pa'aliyetchiler bu heqte inkas qayturup, "Nöwette Uyghur diyarida Uyghur bolghanliqning özi xitay üchün xeterlik bir kimlik bolup qalmaqta," dédi.

Toluq bet