Ürümchidiki métro qatnishi xadimlirini mexsus terbiyilesh bashlinidu

Ürümchi shehiride yolgha qoyulidighan métro qatnishi sahesidiki tunji türkümdiki mexsus terbiye körgen xadimlarni teyyarlash xizmiti bashlinip, deslepki qedemde 740 din artuq oqughuchini oqutush qarar qilin'ghan.

Ürümchidiki métrogha mes'ul ürümchi sheherlik rélisliq qatnash guruhi cheklik mes'uliyet shirkiti métro kespiy téxnika ixtisasliqlirini köpeytish, métro transport tijariti xadimlar qoshunini aldin-ala teyyarlash üchün, shinjang qatnash kespiy téxnika instituti, wuxen tömüryol téxnika terbiyilesh instituti we bashqa bir qisim aliy mektepler bilen birliship, bu yil Uyghur diyari boyiche 748 neper oqughuchi qobul qilip oqutush üchün tizimlash bashlighan.

Tengri tagh torining xewer qilishiche, bu oqughuchilar, métro poyizi heydesh, yürüshleshtürüshni bashqurush, métro poyizini tekshürüp rémont qilish, xewerlishish signali, tömüryol qurulushi qatarliq kesipler boyiche oquydiken. Qobul qilinidighan oqughuchilarning 2017-yili, ottura mektep püttürgenler bolushi békitilgen bolsimu, emma ürümchi shehiridiki mezkur tunji métro qatnishi kespi boyiche qobul qilinidighan oqughuchilarning millet nisbiti namelum. Uyghur közetküchilirining éytishiche, mundaq téxnikiliq kesiplerge oqughuchi qobul qilishta köpinche hallarda xitay millitidin bolghan oqughuchilar köp sanliqni igileydighan bolup, mesilen awi'atsiye kespi we poyiz heydesh qatarliq kesipler boyiche mexsus terbiyilen'gen Uyghur oqughuchilarning sani cheklik bolup kelgen idi.