Ürümchide poyiz béliti sétishning waqitliq toxtitilishi küchlük diqqet qozghimaqta

Muxbirimiz irade
2018-09-27
Élxet
Pikir
Share
Print

Xitay hökümet xewerliridin melum bolushiche, Uyghur aptonom rayonluq tömür yol da'iriliri poyiz béliti sétishni waqitliq toxtatqan.

"Ürümchi kechlik géziti" we xitayning "Sina tori" qatarliq taratquliri 27-séntebir küni xewer tarqitip, Uyghur rayonidiki yoluchilar poyizigha bilet sétishining 10-ayning 22-künidin étibaren waqitliq toxtitilghanliqini jakarlighan. Uqturushta bélet sétishning qachan eslige kélidighanliqi heqqide melumat bérilmigen.

Uyghur aptonom rayonluq tömür yol da'iriliri poyiz béliti sétishni waqitliq toxtitish qararining tömür yol qatnash liniyesidiki bezi özgirishlerge munasiwetlik ikenlikini ilgiri sürgen bolsimu, emma bu hadise chet'ellerdiki közetküchiler arisida küchlük guman qozghimaqta.

Xitayche chiqidighan "Dowéy xewer tori" da élan qilin'ghan bir xewerde chet'ellerdiki bir qisim közetküchilerning buni Uyghur élida chong weqe bolidighanliqining béshariti dep guman qiliwatqanliqi otturigha qoyulghan. Xewerde yene xitay hökümitining Uyghur élida yolgha qoyghan "Yépiq terbiye" lagérliri namidiki jaza lagérliri seweblik xelq'araning küchlük tenqidige uchrawatqanliqi, emma xitay da'irilirining bu eyibleshlerni ret qilip, özlirini "Térrorluqqa qarshi alahide tedbirlerni qollinishqa tamamen heqliq" dewatqanliqini bayan qilghan.

Halbuki, yene bir qisim közetküchiler xitay da'irilirining ürümchide tuyuqsizla poyiz béliti sétishni toxtitishi lagérlardiki tutqunlarni xitay ölkilerge yötkesh we tarqaqlashturush pilani bilen zich munasiwetlik dep qarimaqta. Ularning ilgiri sürüshiche, yéqindin buyan Uyghur élidiki lagérlarda yétiwatqan tutqunlarning türküm-türkümlep xitay ölkiliridiki türmilerge yötkiliwatqanliqi heqqide bezi melumatlar ashkarilanmaqta iken. Ular bu qétimliq poyiz béliti sétishini toxtitishning ene shu mexpiy yötkesh pilani bilen munasiwetlik bolushi mumkinlikini texmin qilmaqta.

Toluq bet